ހއ. ވަށަފަރުގެ ޒުވާނުންގެ މެދުގައި އޮތް ވޮލީބޯޅައިގެ ފޯރިއަށް އިތުރު ބާރެއް ލިބި، އެ ރަށުގައި ޒަމާނީ ފެންވަރަށް ތަރައްގީކުރި އައުޓްޑޯ ވޮލީ ކޯޓު ރަސްމީކޮށް ހުޅުވައިފިއެވެ.
މި ކޯޓު ހުޅުވުމަށްޓަކައި ވަށަފަރުގައި ބޭއްވި ޚާއްޞަ ރަސްމިއްޔާތެއްގައި ކޯޓު ރަސްމީކޮށް ހުޅުއްވައިދެއްވީ ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢުއެވެ.
މި ރަސްމިއްޔާތުގައި ރައްޔިތުންގެ މަޖިލީހުގެ ކެލާ ދާއިރާގެ މެންބަރު ޢަބްދުﷲ ޝަރީފާއި، ވަށަފަރު ކައުންސިލްގެ އިސްވެރިންގެ އިތުރުން އެ ރަށުގެ ގިނަ އަދަދެއްގެ ރައްޔިތުންނާއި ޒުވާނުން ބައިވެރިވެވަޑައިގެންނެވިއެވެ.
ސަރުކާރުން މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮންޕެނީ (އެމްޓީސީސީ) އާ ހަވާލުކޮށްގެން ކުރިއަށްގެންދިޔަ މި މަޝްރޫޢުގެ ދަށުން ބިނާކުރި މި ކޯޓަކީ ރަށުގެ ވޮލީ ކުޅުންތެރިންނަށް ތަމްރީނުތައް ހެދުމަށާއި މުބާރާތްތައް ބޭއްވުމަށް ލިބުނު ވަރަށް ބޮޑު ކުރިއެރުމެކެވެ.
މުޅި ރާއްޖޭގައި ވޮލީބޯޅަ ކުރިއަރުވައި، އަތޮޅުތެރޭގެ ރަށްރަށުގައި ތިބި ހުނަރުވެރި ޒުވާން ކުޅުންތެރިންނަށް ފެންވަރު ރަނގަޅު ވަސީލަތްތައް ހޯދައިދިނުމަށް ސަރުކާރުން އަންނަނީ ރާއްޖޭގެ އެކި ކަންކޮޅުތަކުގައި މިފަދަ ގިނަ މަޝްރޫޢުތަކެއް ހިންގަމުންނެވެ.











