މޫސުމީ ބަދަލުތަކުން ރަށްރަށުގެ ގޮނޑުދޮށްތަކަށް ލިބެމުންދާ ގެއްލުންތަކުން ރައްކާތެރިވުމަށް ހިންގާ ރައްކާތެރިކުރުމުގެ މަޝްރޫއުތަކަށް ބޭނުންވާ ހިލަ ލިބުމުގައި ދަތިތަކެއް ކުރިމަތިވެފައިވާތީ، ޕާކިސްތާނުން ހިލަ އެތެރެކުރުމުގެ އިންތިޒާމުތައް ސަރުކާރުން ހަމަޖައްސަވަން ފައްޓަވައިފިއެވެ.
މިކަން ހާމަކުރެއްވީ ”އަހާ ފޯރަމް“ ގައި އާންމުންގެ މީހަކު ކުރި ސުވާލަކަށް ޖަވާބު ދެއްވަމުން، އުމްރާނީ ތަރައްގީއާއި، ގެދޮރުވެރިކަމާއި، ބިނާރާ ބެހޭ ވަޒީރު ޑރ. އަބްދުﷲ މުއްތަލިބެވެ.
ވަޒީރު ވިދާޅުވި ގޮތުގައި ގޮނޑުދޮށް ހިމާޔަތްކުރުމުގެ މަޝްރޫއުތަކަށް ބޭނުންވާ ހިލަ ގެނައުމުގައި މިހާރު ވަނީ ބޮޑެތި ގޮންޖެހުންތަކަކާ ކުރިމަތިވެފައެވެ. އެގޮތުން ކުރިން އެންމެ ގިނައިން ހިލަ އެތެރެކުރި އިންޑިއާއިން ހިލަ ލިބުން ހުއްޓިފައިވާ އިރު، އެކުވެރި އަރަބި އިމާރާތް (ޔޫއޭއީ) އިން ހިލަ ގެނައުމުގައިވެސް ނުކުރައްވާފަދަ ދަތިތަކާ ވަނީ ކުރިމަތިލާންޖެހިފައެވެ.
އިންޑިއާއިން ހިލަ ގެނައުމަށް ހުރަސްއެޅުނީ އެ ގައުމުގެ ޓެމިލްނާޑޫ ސްޓޭޓް ސަރުކާރުން ހިލަ ބޭރުކުރުން މަނާކުރުމާ ގުޅިގެންނެވެ. އެ މަނާކުރުން މިދިޔަ އޮކްޓޯބަރު މަހުގެ ނިޔަލަށް ނިމޭނެ ކަމަށް ބެލެވުނު ނަމަވެސް، އެ މުއްދަތު އިތުރު ދެ މަސްދުވަހަށް ދަންމާލާފައިވާކަން ވަޒީރު ފާހަގަކުރެއްވިއެވެ.
އޭގެ އިތުރުން ޔޫއޭއީއިން ހިލަ ގެންނަ މައި ބަނދަރު އޮންނަނީ މިހާރު ބަންދުކޮށްފައިވާ ހޮރްމުޒް ކަނޑުއޮޅި ހުރަސްކޮށް އަންނަންޖެހޭ ސަރަހައްދެއްގައި ކަމަށްވާތީ، އެ ގައުމުންވެސް ހިލަ ގެނައުމުގައި ބޮޑެތި ހުރަސްތަކެއް ވަނީ ކުރިމަތިވެފައެވެ.
މި މައްސަލައަށް ހައްލެއް ހޯދުމުގެ ގޮތުން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ޕާކިސްތާނަށް ކުރެއްވި ފުރަމާނަ ދަތުރުފުޅުގައި އެ ގައުމުން ހިލަ ގެނައުމާ ބެހޭ ގޮތުން މަޝްވަރާ ކުރައްވާފައިވާ ކަމަށާއި، އެ މަޝްވަރާތަކުގެ ނަތީޖާއެއްގެ ގޮތުން ޕާކިސްތާނުން ރާއްޖެއަށް ހިލަ އެތެރެކުރުމުގެ ތައްޔާރީތައް މިހާރު ދަނީ ވަމުންނެވެ.
ރައީސްގެ އެ ދަތުރުފުޅުގައި ދެ ގައުމުގެ މެދުގައި ކުރެވޭ ވިޔަފާރީގެ އިންސައްތަ 200 މިލިއަން ޑޮލަރަށް އިތުރުކުރުމަށް އެއްބަސްވެފައިވާ އިރު، ކަރާޗީއާއި ރާއްޖެއާ ދެމެދު ވައިގެ އަދި ކަނޑުގެ ދަތުރުފަތުރުގެ ނިޒާމަކުން ގުޅުވާލުމަށްވެސް ދެ ގައުމުން ވަނީ އެއްބަސްވެފައެވެ.











