ރަޝިއާއަށް ފައިސާ ފޮނުވުމާއި އެ ގައުމުން ފައިސާ ބަލައިގަތުމުގެ މުއާމަލާތްތައް ބޭންކް އޮފް މޯލްޑިވްސް (ބީއެމްއެލް) އިން ހުއްޓާލާފައިވާ ކަމަށް ބުނެ ސޯޝަލް މީޑިއާގައި ފަތުރަމުންދަނީ ހަގީގަތާ ހިލާފު ދޮގު ވާހަކަތަކެއް ކަމަށް އެ ބޭންކުން ހާމަކޮށްފިއެވެ.
ބީއެމްއެލްގެ ސްޕޯކްސްޕާސަން މުހައްމަދު ސައީދު ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ، ރަޝިއާއާއެކު ކުރެވޭ ފައިސާގެ މުއާމަލާތްތަކަށް އެ ބޭންކުން އެއްވެސް ބަދަލެއް ގެނެސްފައި ނުވާނެ ކަމަށެވެ. އަދި މިފަދަ މުއާމަލާތްތައް ހުއްޓާލި ކަމަށް ބުނެ އެއްވެސް މީޑިއާއަކަށް ބޭންކުގެ ފަރާތުން މައުލޫމާތެއް ދީފައި ނުވާނެ ކަމަށްވެސް އޭނާ ފާހަގަކުރެއްވިއެވެ.
ސައީދު އިތުރަށް ވިދާޅުވީ ރަޝިއާއިން ފޮނުވާ ނުވަތަ އެ ގައުމާ ގުޅުންހުރި މުއާމަލާތްތައް ހުއްޓުވުމަށް ބީއެމްއެލްއިން ވަކި ހާއްސަ ސިޔާސަތެއް ކަނޑައަޅާފައި ނުވާ ކަމަށެވެ. އަދި ބޭރު ފައިސާގެ މުއާމަލާތްތައް، ހާއްސަކޮށް އެމެރިކާ ޑޮލަރުގެ މުއާމަލާތްތައް ނިންމުމުގައި އެހެން ބޭންކުތަކެކޭ އެއްފަދައިން ބީއެމްއެލްއިންވެސް ބަރޯސާވަނީ ބައިނަލްއަގުވާމީ ކޮރެސްޕޮންޑެންޓް ބޭންކުތަކަށް ކަމަށް އޭނާ ވިދާޅުވިއެވެ.
ރަޝިއާއަށް ފައިސާ ފޮނުވުމަށާއި އެ ގައުމުން ފައިސާ ބަލައިގަތުމަށް ބޭންކް އޮފް މޯލްޑިވްސް އިން އެއްވެސް ބަދަލެއް ގެނެސްފައި ނުވާއިރު، އެފަދަ މުއާމަލާތްތައް ހުއްޓާލައިފި ކަމަށް ބުނެ ފަތުރަމުންދަނީ ހަގީގަތާ ހިލާފު ދޮގު ވާހަކަތަކެކެވެ. އަދި މިކަމާ ގުޅޭގޮތުން ބޭންކުގެ ފަރާތުން…
— Mohamed Saeed (@BMLSpokesperson) November 9, 2026
ކޮރެސްޕޮންޑެންޓް ބޭންކުތަކުން އަމަލުކުރަނީ އެ ފަރާތްތަކުގެ އަމިއްލަ ކޮމްޕްލަޔަންސް ސިޔާސަތުތަކާއި ފިޔަވަޅުތަކަށް ކަމަށާއި، އޭގެ ތެރޭގައި މުއާމަލާތްތަކުގައި ބައިވެރިވާ ފަރާތްތަކާއި އޭގެ މަންފާ ލިބޭ ފަރާތްތައް ސްކްރީންކުރުން ހިމެނޭ ކަމަށް ސައީދު ފާހަގަކުރެއްވިއެވެ. އެހެންކަމުން، އެ ފަދަ ސިޔާސަތުތަކުގެ ތެރެއަށް ނުފެތޭ މުއާމަލާތްތައް ކޮރެސްޕޮންޑެންޓް ބޭންކުތަކުން ބަލައިނުގަތުމަކީ ނުވަތަ އަނބުރާ ފޮނުވާލުމަކީ އެކަށީގެންވާ ކަމެއް ކަމަށާއި، އެ ފަދަ ނިންމުންތަކަށް ބީއެމްއެލްއިން އަމަލުކުރަން ޖެހޭ ކަމަށްވެސް އޭނާ ވިދާޅުވިއެވެ.
މިފަދަ ހަގީގަތާ ހިލާފު ދޮގު ވާހަކަތައް ފެތުރުމުގެ ސަބަބުން ރާއްޖޭގެ ޓޫރިޒަމަށާއި އިގްތިސާދަށް އޭގެ ނޭދެވޭ އަސަރު ކުރުން އެކަށީގެންވާ ކަމަށްވެސް ބީއެމްއެލްއިން ވަނީ ބުނެފައެވެ.












