ރާއްޖޭގެ ޓާޝަރީ ހޮސްޕިޓަލްތައް އެއް ނެޓްވޯކެއްގެ ދަށުން އެއް މެނޭޖުމަންޓަކުން ހިންގަން ފެށުމާއެކު، ސިއްހީ ޚިދުމަތްތައް އަވަސްވެ އިސްރާފު ކުޑަވެގެންދާނެ ކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.
ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ރައީސް ވިދާޅުވީ، އަލަށް އުފެއްދެވި ”މޯލްޑިވްސް ޓަރޝަރީ ހޮސްޕިޓަލްސް ގްރޫޕު“ ގެ ސަބަބުން މިހާރު ޓާޝަރީ ފެންވަރުގައި ހިންގާ ތަންތަނާއި، އެ ފެންވަރަށް މަތިކުރުމުގެ މަސައްކަތް ކުރަމުންދާ ހޮސްޕިޓަލްތައް އެއް ވިއުގައަކުން ގުޅާލެވޭނެ ކަމަށެވެ. މީގެ ނަތީޖާއެއްގެ ގޮތުން ވަސީލަތްތައް ތަކުރާރުވުން ނެތިގޮސް، ހުރިހާ ހޮސްޕިޓަލަކުންވެސް އެންމެ މަތީ ފެންވަރުގެ ސިއްހީ ފަރުވާ ދިނުމަށް މަގުފަހިވެގެންދާނެ ކަމަށް އެމަނިކުފާނު ފާހަގަކުރެއްވިއެވެ.
މި ބަދަލާއެކު ރައްޔިތުންނަށް ލިބޭ ޚިދުމަތުގެ ފެންވަރު މަތިވެގެންދާނެކަން ފާހަގަކުރައްވައި ރައީސް ވިދާޅުވީ، ނިޒާމަށް ގެންނަންޖެހޭ ބަދަލުތައް ގެނައުމުގެ މަސައްކަތް މިހާރު ފެށިފައިވާ ކަމަށެވެ. އަދި ކުރިއަށް އޮތް ތިން މަސްދުވަހުގެ ތެރޭގައި އެކަންކަން މުޅިން ނިންމާލެވޭނެ ކަމަށްވެސް ވިދާޅުވިއެވެ.
މި ނިޒާމު ގާއިމުކުރުމުގެ ފުރަތަމަ ފިޔަވަޅެއްގެ ގޮތުން، މާލެ ސިޓީ ގްރޫޕް އޮފް ހޮސްޕިޓަލްސް (އެމްސީޖީއެޗް) ގެ އިތުރުން ކުޅުދުއްފުށި ރީޖަނަލް ހޮސްޕިޓަލާއި، އުނގޫފާރު ރީޖަނަލް ހޮސްޕިޓަލާއި، ގަން ރީޖަނަލް ހޮސްޕިޓަލާއި، ޑރ. ޢަބްދުއްޞަމަދު މެމޯރިއަލް ހޮސްޕިޓަލް އަދި އައްޑޫ އިކުއެޓޯރިއަލް ހޮސްޕިޓަލުގެ ގަވަރނިންގ ބޯޑުތައް މި މަހުގެ 3 ވަނަ ދުވަހު ވަނީ އުވާލައްވާފައެވެ.
މޯލްޑިވްސް ޓަރޝަރީ ހޮސްޕިޓަލްސް ގްރޫޕް (އެމްޓީއެޗްޖީ) ގެ ގަވަރނިންގ ބޯޑާއި، އެ ގްރޫޕުގެ ދަށުން ހިންގާ ތަންތަނުގެ ކަންކަން ވިލަރެސްކުރެއްވުމުގެ މަސްއޫލިއްޔަތު ރައީސުލްޖުމްހޫރިއްޔާ ހަވާލުކުރައްވާފައިވަނީ ރައީސް އޮފީހުގެ ޕްރިންސިޕަލް ސެކްރެޓެރީ ޓު ދަ ޕްރެޒިޑެންޓް ފޮރ ޓަރޝަރީ ހެލްތު ސަރވިސަސްއާއެވެ.












