12 ޕެރަ އެތުލީޓުން ހިމެނޭހެން ޖުމްލަ 200 ޝޫޓަރުންނާއެކު ޤައުމީ ޝޫޓިން ސްޕޯޓް އެސޯސިއޭޝަން ޗެމްޕިއަންޝިޕް 2026 ފަށައިފިއެވެ. މި މުބާރާތް ކުރިއަށްދަނީ ހުޅުމާލޭ ޝޫޓިން ރޭންޖުގައެވެ.
މިއަހަރުގެ މުބާރާތުގެ އެންމެ ޚާއްޞަ އެއް ކަމަކީ، ތާރީޚުގައި ފުރަތަމަ ފަހަރަށް ޕެރަލިމްޕިކް ކެޓަގަރީ މުބާރާތުގައި ހިމަނާފައިވުމެވެ. މި ކެޓަގަރީގެ އިތުރުން މުބާރާތުގައި ހިމެނޭ އެހެން ބައިތަކުގެ ތެރޭގައި ޕްރޮފެޝަނަލް ކެޓަގަރީ، ޖޫނިއާ ކެޓަގަރީ، ޔޫތު ކެޓަގަރީ އަދި އެމެޗުއަރ ކެޓަގަރީ ހިމެނެއެވެ. އެއާ ރައިފަލް އަދި އެއާ ޕިސްޓަލް ހިމެނޭހެން ކުރިއަށްދާ މި މުބާރާތުގައި ކޮންމެ އުމުރުފުރާއަކުން އަންހެން، ފިރިހެން އަދި މިކްސްޑް ޓީމް އިވެންޓްތަކުގެ އިތުރުން އަންހެން އަދި ފިރިހެން ވަކިވަކި ޓީމް އިވެންޓްތައްވެސް ކުރިއަށްދާނެއެވެ.
މުބާރާތް ފެށުމުގެ ކުރިން، ވާދަކުރާ ޝޫޓަރުންގެ ހުނަރު އިތުރަށް ތަރައްޤީކޮށް ތައްޔާރުވުމުގެ ގޮތުން ހުޅުމާލޭ ޝޫޓިން ރޭންޖުގައި ޚާއްޞަ ތަމްރީނުތަކެއް ވަނީ ކުރިއަށް ގެންގޮސްފައެވެ. މި ތަމްރީނުތަކަށްފަހު މުބާރާތާ ކުރިމަތިލީ ބައެއް ޝޫޓަރުން ޕީއެސްއެމް ނިއުސްއާ ވާހަކަދައްކަމުން ބުނީ، މިފަދަ މުބާރާތެއް އާންމުންނަށް ހުޅުވާލައިގެން ބޭއްވުމަކީ ލިބުނު ވަރަށް ބޮޑު ހިތްހަމަޖެހުމެއް ކަމަށާއި، މި މުބާރާތުން ރަނގަޅު ކާމިޔާބީއަކާއި ވަނައަކަށް އުންމީދުކުރާ ކަމަށެވެ.
ޝޫޓިން އެސޯސިއޭޝަން އޮފް މޯލްޑިވްސްއިން ހާމަކުރި ގޮތުގައި، މި މުބާރާތް އާންމުންނަށް ހުޅުވާލައިގެން ކުރިއަށް ގެންދިއުމުގެ މައިގަނޑު ބޭނުމަކީ ރާއްޖޭގައި ޝޫޓިން ކުޅިވަރު އިތުރަށް ފުޅާކޮށް ކުރިއެރުވުމާއި، މި ދާއިރާއިން ހުނަރުވެރި ޒުވާން އެތުލީޓުން ބިނާކޮށް ތަމްރީނު ކުރުމެވެ.
އަދި މީގެ އިތުރުން، އޮލިމްޕިކްސްގައިވެސް ހިމެނޭ މި ޝަރަފުވެރި ކުޅިވަރުން ފުންނާބުއުސް އެތުލީޓުން އުފައްދައި، ޤައުމީ ފެންވަރުގައްޔާއި ބައިނަލްއަޤްވާމީ މައިދާނުގައި ވާދަކުރުމުގެ ފުރުސަތުތައް ފަހިކޮށްދިނުމަކީ އެ އެސޯސިއޭޝަނުގެ ބޮޑު އަމާޒެކެވެ. އެސޯސިއޭޝަނުން މަސައްކަތް ކުރަމުންދަނީ ބައިނަލްއަޤްވާމީ ވާދަކުރުންތަކުގައި ދިވެހިރާއްޖެ ތަމްސީލުކޮށް، ޤައުމަށް ރީތި ނަމާއި ޝަރަފު ހޯދައިދޭނެ ފަދަ ވަރުގަދަ ޤައުމީ ޝޫޓިން ޓީމެއް ބިނާކުރުމަށެވެ.
