ދ. މީދޫ އަތޮޅު މަދަރުސާގައި ކިޔަވަމުންދާ ދަރިވަރަކަށް އަމާޒުކޮށް ޓިކްޓޮކްގައި ވަގު އެކައުންޓްތަކެއް ހަދައިގެން ސައިބަރ ބުލީކުރަމުންދާ މައްސަލަ ފުލުހުންގެ ސަމާލުކަމަށް އައިސް، އެ މައްސަލަ އިތުރަށް ބަލައި ތަހުގީގު ކުރަމުންދާ ކަމަށް ފުލުހުން މައުލޫމާތު ދީފިއެވެ.
މި މައްސަލައާ ގުޅިގެން ’އެކިއެމްވީ‘ އަށް މައުލޫމާތު ދެމުން ފުލުހުން ބުނީ، ދ. މީދޫ އަތޮޅު މަދަރުސާގެ ދަރިވަރަކަށް ސޯޝަލް މީޑިއާގައި ބުލީކުރާ ކަމަށް ބުނެ ފެންމަތިވެފައިވާ މައްސަލައާ ގުޅިގެން ބަލަންޖެހޭ ކަންކަން ފުލުހުން ބަލަމުންދާ ކަމަށެވެ.
ފުލުހުން ބުނީ ސެންޓްރަލް ޕޮލިސްގައި ހިމެނޭ ރަށެއްގެ ސްކޫލު ދަރިވަރުންތަކެއް، އެހެން ދަރިވަރަކަށް އިންޓަނެޓް މެދުވެރިކޮށް ބުލީކުރިކަމަށް ތުހުމަތުކުރެވޭ މައްސަލައެއް ކަމާގުޅުންހުރި އިދާރާތަކާ ގުޅިގެން ފުލުހުން ގެންދަނީ ތަހުގީގު ކުރަމުން ކަމަށެވެ.
އެ މަދަރުސާގައި ކިޔަވަމުންދާ މަނާފް ނަމަކަށް ކިޔާ ދަރިވަރަކަށް އަމާޒުކޮށް، އެކި ކަހަލަ ހަގީގަތާ ހިލާފު ވާހަކަތަކާއި އަބުރަށް ހުތުރުވާފަދަ މެސެޖުތައް ޓިކްޓޮކް މަންސައިގައި އާންމުކުރަމުންދަނީ އެ މަދަރުސާގެ އެހެން ދަރިވަރުންތަކެއް އިސްވެ ތިބެގެން ކަމަށް މައުލޫމާތު ލިބެއެވެ. މީގެ ތެރޭގައި އެ ދަރިވަރު މަދަރުސާއަށާއި ޓީޗަރުންނަށް އަދި ޕްރިންސިޕަލަށް ފާޑުކިޔައި އިހާނެތިކޮށް ވާހަކަދެއްކި ކަމަށް ބުނެ ސޯޝަލް މީޑިއާގައި ދޮގު ތުހުމަތުތައް ފަތުރަމުންދާކަން ވަނީ ހާމަވެފައެވެ.
މި ކަމާ ގުޅިގެން ކަންބޮޑުވުން ފާޅުކުރި ބެލެނިވެރިޔަކު ބުނެފައިވަނީ، މިފަދަ ނުރައްކާތެރި ސައިބަރ ބުލީކުރުމުގެ މައްސަލަތަކަށް އަމަލީ ގޮތުން ފިޔަވަޅުު ނުއަޅައި ދޫކޮށްލައިފިނަމަ، ދަރިވަރުގެ ނަފްސާނީ އަދި ޖިސްމާނީ ރައްކާތެރިކަމަށް ނުރައްކާވެ، ދެރަ ހާދިސާއެއް ހިނގުމުގެ ފުރުސަތު ބޮޑު ކަމަށެވެ. އަދި އެފަދަ ދެރަ ކަމެއް ހިނގައިފިނަމަ އެކަމުގެ ޒިންމާ ނަގާނީ ކާކުތޯވެސް ސުވާލު އުފައްދާފައިވެއެވެ.
މީގެ އިތުރުން، އެ މަދަރުސާގެ ޕްރިންސިޕަލް ފަޒީ ގަފޫރް، ދަރިވަރުންގެ މިފަދަ ނުރައްކާތެރި މައްސަލަތައް ހައްލުކުރުމަށް ސަމާލުކަން ދެއްވުމުގެ ބަދަލުގައި، އަމިއްލަ ޓިކްޓޮކް ވީޑިއޯތައް ހެދުމުގައި ބިޒީކޮށް އުޅުއްވާ ކަމުގެ ތުހުމަތުވެސް ވަނީ ކުރެވިފައެވެ.
ސްކޫލްތަކުގައި ހިނގާ ސައިބަރ ބުލީކުރުމުގެ މައްސަލަތަކަކީ ދަރިވަރުންގެ ނަފްސާނީ ދުޅަހެޔޮކަމަށް ބޮޑެތި ނޭދެވޭ އަސަރުތަކެއް ކުރާ ކަމަކަށްވާއިރު، މިއީ ތައުލީމީ ދާއިރާއާއި ކަމާބެހޭ މުއައްސަސާތަކުން ހާއްސަ ސަމާލުކަމެއް ދޭންޖެހޭ މައްސަލައެކެވެ.
އެހެންކަމުން، ދ. މީދޫ އަތޮޅު މަދަރުސާގައި ހިނގަމުންދާ މި މައްސަލައިގެ ތެދުދޮގު އަވަސް މުއްދަތެއްގެ ތެރޭގައި ހޯދައި، އެކަމުގައި ޒިންމާވާ ފަރާތްތަކާމެދު ފިޔަވަޅު އަޅައި، ދަރިވަރުންނަށް ރައްކާތެރި މާހައުލެއް ކަށަވަރުކޮށްދިނުމަށް އާންމުންނާއި ބެލެނިވެރިން ދަނީ ކަމާބެހޭ ފަރާތްތަކަށް ގޮވާލަމުންނެވެ.
