ދިވެހިރާއްޖޭގެ މީހުން ދިރިއުޅޭ ރަށްރަށުގައި ޤުރްއާން އުނގަންނައިދޭ މަރުކަޒުތައް ޤާއިމުކުރުމަށް ސަރުކާރުން ކުރިއަށްގެންދަވާ ޚާއްސަ މަޝްރޫޢުގެ ދަށުން، ކީރިތި ޤުރްއާނާ ބެހޭ ޤައުމީ މަރުކަޒުގެ އާ ގޮތްޕެއް ލ. ގަމުގައި ރަސްމީކޮށް ހުޅުވައިފިއެވެ.
މިކަމަށްޓަކައި ލ. ގަމުގައި ބޭއްވުނު ޚާއްޞަ ރަސްމިއްޔާތެއްގައި މި ގޮފި ރަސްމީކޮށް އިފްތިތާޙުކޮށްދެއްވީ ޑެޕިއުޓީ މިނިސްޓަރ އޮފް އިސްލާމިކް އެފެއާޒް އަލްއުސްތާޛު ޢަބްދުލް ޣަފޫރު އަޙްމަދެވެ. މި ރަސްމިއްޔާތުގައި ކީރިތި ޤުރްއާނާ ބެހޭ ޤައުމީ މަރުކަޒުގެ އިސްވެރިންނާއި، ގަން ކައުންސިލް އިދާރާގެ ވެރިންނާއި މެންބަރުން ބައިވެރިވެވަޑައިގެންނެވިއެވެ.
ރާއްޖޭގެ ހުރިހާ ރަށެއްގައި ކީރިތި ޤުރުއާނާއި ބެހޭ ޤައުމީ މަރުކަޒުގެ ގޮފިތައް ޤާއިމުކުރުމަށް ސަރުކާރުން ފަށާފައިވާ ޚާއްސަ މަޝްރޫޢުގެ ދަށުން، ލ. ގަމުގައި ކީރިތި ޤުރުއާނާއި ބެހޭ ޤައުމީ މަރުކަޒުގެ ގޮފި ހުޅުވައިފި.@MMuizzu @presidencymv @Mohamedshaheem1 pic.twitter.com/SfvYGkczFI
— Ministry of Islamic Affairs & Endowments (@MVIaffairs) November 7, 2026
އިސްލާމިކް މިނިސްޓްރީން ބުނިގޮތުގައި މި ޒިޔާރަތުގެ ތެރެއިން، ގަމު ގޮފީގައި ހިންގުމަށް ހަމަޖެހިފައިވާ ޤުރްއާން ތަޢުލީމުގެ ޕްރޮގްރާމްތައް އިތުރަށް ހަރުދަނާކުރުމަށާއި، އިދާރީ ހިންގުން ހަމަޖެއްސުމުގެ އިތުރުން މި މަސައްކަތް ދެމެހެއްޓެނިވި ގޮތެއްގައި ކުރިއަށްގެންދިއުމާ ގުޅޭގޮތުން މުހިންމު މަޝްވަރާތަކެއް ކުރެވުނެވެ. އެގޮތުން، ގަމު ކައުންސިލް އިދާރާއާއި އެ ރަށު އަންހެނުންގެ ތަރައްޤީއަށް މަސައްކަތްކުރާ ކޮމިޓީ (ޑަބްލިއުޑީސީ) ގެ މަންދޫބުންނާއެކު ޚާއްޞަ ބައްދަލުވުންތަކެއް ބާއްވާފައިވާކަމަށް މިނިސްޓްރީން ބުނެއެވެ.
އިސްލާމިކް މިނިސްޓްރީން މަޢުލޫމާތު ދެއްވި ގޮތުގައި، މި ގޮފި ހުޅުވިގެން ދިއުމަކީ ރާއްޖޭގައި ޤުރްއާނުގެ ތަޢުލީމު ލާމަރުކަޒީކުރުމަށާއި، އަތޮޅުތަކުގެ ދަރިވަރުންނަށް ފަސޭހަކަމާއެކު ކީރިތި ޤުރްއާން އުނގެނުމާއި، ރީތިކޮށް ކިޔެވުމާއި، އަދި ހިފްޡުކުރުމުގެ ފުރުޞަތުތައް ފުޅާކުރުމަށް ސަރުކާރުން ކުރައްވަމުން ގެންދަވާ މަސައްކަތްތަކަށް ލިބުނު ވަރަށް ބޮޑު ކުރިއެރުމެކެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ޒަޢާމަތުގައި، ރާއްޖޭގައި އިސްލާމީ ޢިލްމު ފެތުރުމާއި ވަރުގަދަކުރުމަށާއި، ކީރިތި ޤުރްއާން ހިތުދަސްކުރާ ޙާފިޡުން އިތުރުކުރުމަށް ވަނީ ޚާއްޞަ އިސްކަމެއް ދެއްވާފައެވެ. އަދި އަންނަން އޮތް ޖީލުތަކަކީ ޤުރްއާނުގެ ޢިލްމަށް އަހުލުވެރި ބަޔަކަށް ހެދުމަށްޓަކައި މުޅި ރާއްޖެއަށް އަމާޒުކޮށްގެން ދައުލަތުން ދަނީ ގިނަގުނަ މަސައްކަތްތަކެއް ކުރަމުންނެވެ.
