އަމިއްލަ ގޯތީގައި ގެދޮރު އިމާރާތް ކުރުމަށް ސަރުކާރުން ދޫކުރާ ”ހިޔާވަހި ފައިނޭންސް ސްކީމް“ގެ ދަށުން އެދޭ މިންވަރަށް ލޯނު ނުލިބި، އާންމުންނަށް ކުރިމަތިވާ ދަތިތަކަށް އެދެވޭ ހައްލެއް ހޯއްދަވައިދެއްވާނެ ކަމުގެ ޔަގީންކަން ރައީސް މުހައްމަދު މުއިއްޒު ދެއްވައިފިއެވެ.
”ރައްޔިތުންގެ އަޑު“ ސިލްސިލާ ޕްރޮގްރާމްގެ 12 ވަނަ އެޕިސޯޑުގައި އާންމު ފަރާތަކުން ވަނީ ރަށްރަށުގެ ކެޓަގަރީން ރަހުނަކާ ނުލައި އެއް މިލިއަން ރުފިޔާއާ ހަމައަށް ލޯނު ދޫކުރުމަށް ހަމަޖެހިފައިވީ ނަމަވެސް، އެޕްލައި ކުރުމުން ލިބުނީ 650،000 ރުފިޔާ ކަމަށާއި އެ އަދަދުން އިމާރާތް ކުރުމުގެ މަސައްކަތް ނުނިންމޭ ކަމުގެ ކަންބޮޑުވުން ހިއްސާކޮށްފައެވެ.
މި ކަމާ ގުޅިގެން ރައީސް މުއިއްޒު ވިދާޅުވީ، އެފަދަ މައްސަލައެއް މީގެ ކުރިން ސަމާލުކަމަށް އައިސްފައި ނުވާ ކަމަށާއި، ރަށްރަށުގައި ގެދޮރު އިމާރާތް ކުރުމަށް ހަ ލައްކަ ރުފިޔާއިން މަސައްކަތް ނުނިންމޭނެކަން ގަބޫލުފުޅު ކުރައްވާ ކަމަށެވެ. އަދި ލޯނުގެ އަދަދު ކުޑަވީ އާމްދަނީއަށް ބަލައިގެންތޯ ހައުސިން މިނިސްޓްރީ މެދުވެރިކޮށް ބައްލަވައި، އުސޫލުގެ ތެރެއިން ލޯނު ޓޮޕްއަޕް ކުރެވޭނެ އިންތިޒާމެއް އޮތްތޯ ބައްލަވައިދެއްވާނެ ކަމަށްވެސް ވިދާޅުވިއެވެ.
ހިޔާވަހި ސްކީމުގެ ދަށުން ރަށްވެހި ފައިނޭންސިންގެ އިތުރުން ސަހަރު ފައިނޭންސިން އާއި ފަހިމާލެ ފައިނޭންސިންގެ ނަމުގައި ތިން ކެޓަގަރީއަކުން ލޯނު ދޫކުރެއެވެ. ގެދޮރުވެރިކަމާ ބެހޭ ވުޒާރާގެ މައުލޫމާތުތަކަށް ބަލާއިރު، މި ސްކީމުގެ ދަށުން މިހާތަނަށް 891 މީހަކަށް ލޯނު ހަމަޖެހިފައިވާއިރު، އޭގެ ތެރެއިން 244 މީހަކަށް ވަނީ ފައިސާ ދޫކޮށްފައެވެ.












