އިސްތިއުމާރުކޮށްފައިވާ ވެސްޓު ބޭންކުގައި ބައިތުލަޙަމް (ބެތުލެހެމް) ކައިރީގައިވާ ދެހީޝާ ރެފިއުޖީ ކޭމްޕަށް އިސްތިއުމާރީ ވެރިކަން، އިޒްރޭލުގެ ޓެރަރިސްޓު ސިފައިންނާއި ހަރުކަށި ފިކުރު ޔަހޫދީ ވަޒަންވެރިން ވަދެ، ވިޔަފާރިކުރާ ގުދަނެއްގައި ހުރި އެތަކެއްހާސް ޝެކެލްގެ އަގުހުރި ކުކުޅުބިސް ކޭސްތަކެއް ހަލާކުކޮށް ތަޅާލާފައެވެ.
ފަލަސްޠީނުގެ ރިޕޯޓުތައް ބުނާ ގޮތުގައި، ނޮވެމްބަރު 3 ވީ އަންގާރަ ދުވަހު އިޒްރޭލު ސިފައިން ދެހީޝާ ކޭމްޕަށް ވަދެ ހިންގި އަސްކަރީ ޙަރަކާތުގެ ތެރޭގައި، ކާބޯތަކެތި ރައްކާކުރާ ގޯޑައުންއަކަށް ވަދެ ވަނީ އެތަނުގައި ހުރި ގިނަ އަދަދެއްގެ ކުކުޅުބިސް ފޮށިތައް އުކާލައި ތަޅާލާފައެވެ. މިއީ އެ ކޭމްޕުގެ ވިޔަފާރިވެރިންނަށް ލިބުނު އެތައްހާސް ޝެކެލްގެ ބޮޑު މާލީ ގެއްލުމެކެވެ.
Israeli forces destroyed thousands of shekels’ worth of eggs at a warehouse in Dheisheh refugee camp near Bethlehem in the occupied West Bank on November 3, according to Palestinian reports.
Some Palestinian sources stated that illegal Israeli settlers smashed the crates under… pic.twitter.com/eoFV9QjV1h
— TRT World (@trtworld) November 4, 2026
ކޭމްޕުގެ އާންމުން ހާމަކުރި ގޮތުގައި، އިޒްރޭލު ސިފައިންގެ ޙިމާޔަތުގައި ކޭމްޕަށް ވަދެގަތް ހައްދުފަހަނައެޅި ޔަހޫދީ ވަޒަންވެރިންވެސް ވަނީ މި ތަކެތި ހަލާކުކުރުމުގައި ސީދާ ބައިވެރިވެފައެވެ. މިއީ ވެސްޓު ބޭންކުގައި ފަލަސްޠީނު ރައްޔިތުންގެ އިޤްތިޞާދީ އަދި ކާބޯތަކެތީގެ ވަޞީލަތްތައް ހަލާކުކުރުމަށް އިޒްރޭލުން ދުވަހުން ދުވަހަށް ހިންގަމުންދާ ޖަރީމާތަކުގެ ތެރެއިން ހިނގި ކަމެކެވެ.
މި ހާދިސާ ހިނގާފައިވަނީ ވެސްޓު ބޭންކުގެ އެކި ސަރަޙައްދުތަކުގައި ފަލަސްޠީނު މުސްލިމުންގެ ޒައިތޫނި ދަނޑުތަކާއި، ދޮންކެޔޮ ދަނޑުތަކަށް ހައްދުފަހަނައަޅާފައިވާ އިޒްރޭލު ޔަހޫދީ ވަޒަންވެރިން ޙަމަލާދީ ތަކެތި ފޭރެމުންދާ ދަނޑިވަޅެއްގައެވެ. ދެހީޝާ ކޭމްޕުގެ ކާބޯތަކެތި ރައްކާކުރާ ތަންތަނަށް ހަމަލާދިނުމަކީ ކޭމްޕުގެ އާންމު ރައްޔިތުންނަށް ކާބޯތަކެތި ލިބުމަށް އޮތް ބޮޑު ހުރަހެކެވެ.













