ދައުލަތުގެ މައި ތިން ބާރު ތަމްސީލުކުރާ އިމާރާތްތަކުގައި ހުޅުޖެހުމަށް ސޯޝަލް މީޑިއާގައި ހިތްވަރުދިން ކަމުގެ ތުހުމަތުގައި ހައްޔަރުކޮށްފައިވާ ކުރީގެ ޑެޕިއުޓީ މިނިސްޓަރު ޒިހާން ހަސަންގެ ބަންދުގެ މުއްދަތު އިތުރު 14 ދުވަހަށް ކޯޓުން އިތުރުކޮށްފިއެވެ.
ފުވައްމުލަކުން ހައްޔަރުކުރި ޒިހާންގެ ބަންދާމެދު ގޮތެއް ނިންމަން ކޯޓަށް ހާޒިރުކުރުމުން އިތުރު 14 ދުވަސް ދީފައިވާކަން ފުލުހުންގެ ތަރުޖަމާނު އަހުމަދު ޝިޔާމް ވަނީ ކަށަވަރުކޮށްދެއްވާފައެވެ. ކުރިން އޭނާ ހުރީ 15 ދުވަހުގެ ބަންދެއްގައެވެ.
ޒިހާން ހައްޔަރުކުރީ އަލްބޭނިއާގެ ސުޕްރީމް ކޯޓުގައި މުޒާހަރާގެ ބައިވެރިން ހުޅުޖެހި ހާދިސާއެއްގެ ޚަބަރު ފޭސްބުކްގައި ހިއްސާކުރަމުން، ރާއްޖޭގެ ރައީސުލްޖުމްހޫރިއްޔާގެ އޮފީހާއި ރައްޔިތުންގެ މަޖިލިސް އަދި ސުޕްރީމް ކޯޓުގެ އިމާރާތުގައި މީހުން ހުޅުނުޖަހަނީ ކީއްވެގެންތޯ ސުވާލުކޮށް، އެފަދަ ކަމެއް ކުރުމަށް ހިތްވަރުދީފައިވާ މައްސަލައިގައެވެ. އެ ޕޯސްޓު ކުރިތާ ގަޑިއެއްހާއިރު ތެރޭގައި ޑިލީޓްކުރި ނަމަވެސް، މައްސަލަ ވަނީ ފުލުހުންނަށް ރިޕޯޓުކޮށްފައެވެ.
ޔޫއެސް ނޭވަލް އެކެޑަމީން ތައުލީމު ހާސިލުކުރައްވާފައިވާ ޒިހާން ވަނީ ކުރިން އެމްއެންޑީއެފްގެ ފަސްޓް ލެފްޓިނެންޓްކަމާއި ނޭވަލް އާކިޓެކްޓެއްގެ މަގާމު އަދާކުރައްވާފައެވެ. ސިފައިންގެ ޚިދުމަތުން ވަކިކުރުމަށްފަހު، 2024 ވަނަ އަހަރު ޓްރާންސްޕޯޓް މިނިސްޓްރީގެ ޑެޕިއުޓީ މިނިސްޓަރުގެ މަގާމަށް އައްޔަންކުރެވުނު ނަމަވެސް ފަހުން ވަނީ އެ މަގާމުންވެސް ވަކިކޮށްފައެވެ.
