އިދިކޮޅު މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އިން އިކޮނޮމިކް މިނިސްޓަރު މުހައްމަދު ސައީދުގެ އިތުބާރު ނެތްކަމަށް ރައްޔިތުންގެ މަޖިލީހަށް ހުށަހެޅި މައްސަލަ ނާކާމިޔާބުވެ، އޭނާގެ އިތުބާރު އޮތްކަމަށް މަޖިލީހުގެ ތަޅުމުން މިއަދު ފާސްކޮށްފިއެވެ.
މިއަދު ނެގުނު އެ ވޯޓާއެކު، ސައީދު މަގާމުން ވަކިކުރުމަށް އިދިކޮޅު ފަރާތްތަކުން ކުރި މަސައްކަތް ވަނީ ނާކާމިޔާބުވެފައެވެ.
މަޖިލީހުގެ 13 މެންބަރަކު ސޮއިކުރައްވައި ހުށަހެޅުއްވި މި މައްސަލައިގައި ނެގުނު ވޯޓުގައި، މިނިސްޓަރު ސައީދުގެ އިތުބާރު އޮތްކަމަށް 54 މެންބަރަކު ވޯޓު ދެއްވިއިރު، އިތުބާރު ނެތްކަމަށް ވޯޓު ދެއްވީ 10 މެންބަރުންނެވެ.
އެމްޑީޕީގެ ފަރާތުން މި މައްސަލަ މަޖިލީހަށް ހުށަހެޅި ސަބަބުތަކުގެ ތެރޭގައި، ކަޅުބާޒާރުގައި ޑޮލަރުގެ އަގު އުފުލި ތަކެތީގެ އަގު އިންތިހާއަށް ބޮޑުވުމާއި، ދައުލަތުގެ މުދަލާއި ފައިސާ އަމާނާތްތެރިކަމާއެކު ނުބެލެހެއްޓުމުގެ އިތުރުން މަޖިލީހަށް ޖަވާބުދާރީވުމަށް ހުރަސްއެޅުން ހިމެނެއެވެ. އަދި އެސްއީޒެޑް ގާނޫނަށް ގެނައި އިސްލާހުތަކާއި، ބިޔަ މަޝްރޫއުތައް އިއުލާނުކުރުމަށްފަހު މަސައްކަތްތައް ހުއްޓިފައިވާކަން ވެސް އިދިކޮޅުން ފާހަގަކުރިއެވެ.
މި ތުހުމަތުތަކަށް ޖަވާބުދެއްވަމުން މިނިސްޓަރު ސައީދު ވިދާޅުވީ، ޑޮލަރުގެ ދަތިކަމާ ގުޅޭގޮތުން އިދިކޮޅުން ކުރަނީ ހަގީގަތާ ހިލާފު ދޮގު ތުހުމަތުތަކެއް ކަމަށެވެ. އަދި ކުރީ ސަރުކާރުގެ ފުރަތަމަ ތިން އަހަރާ އަޅާބަލާއިރު، މި ސަރުކާރުގެ ފުރަތަމަ ތިން އަހަރު ބޭންކުތައް މެދުވެރިކޮށް ރަސްމީ ރޭޓުގައި ދޫކުރި ޑޮލަރުގެ އަދަދު %80 އިތުރުވެފައިވާކަން އޭނާ ފާހަގަކުރެއްވިއެވެ.











