ދިވެހިރާއްޖޭގެ ސައްތައިން ސައްތަ އިސްލާމީ އައިޑެންޓިޓީއާއި ފުރިހަމަ މިނިވަންކަމުގެ އިތުރުން ގައުމިއްޔަތުގެ އެއްވެސް ރުކުނަކަށް ކުޑަވެސް އުނިކަމެއް އަންނާނެ ފަދަ ނިންމުމެއް ނުނިންމަވާނެ ކަމުގެ ފުރިހަމަ ޔަގީންކަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ދެއްވައިފިއެވެ.
މި އަހަރުގެ ނަސްރުގެ ދުވަސް ފާހަގަކުރުމުގެ ގޮތުން ޖުމްހޫރީ މައިދާން ސަރަހައްދުގައި ބޭއްވި ހާއްސަ ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ، އެމަނިކުފާނު އަޅުއްވާ ކޮންމެ ފިޔަވަޅަކާއި ނިންމަވާ ކޮންމެ ނިންމެވުމެއްގެ އަސްލަކީ ގައުމީ ބަހާތަކަށް ފުރިހަމަ ދިރުމާއި ރައްކާތެރިކަން ކަށަވަރުކޮށްދިނުން ކަމަށެވެ. އަދި ސަރުކާރުގެ ހުރިހާ އަމާޒެއް ބައްޓަންވެފައިވަނީ ދިވެހި ރައްޔިތުންނަށް އުފާވެރި، ތަރައްގީވެފައިވާ މުސްތަގުބަލެއް ހޯދައިދިނުމަށް ކަމަށް އެމަނިކުފާނު ފާހަގަކުރެއްވިއެވެ.
ނޮވެމްބަރު 3، 1988 ގައި ދިވެހި އުންމަތް ހޯދި ނަސްރަށް އަލިއަޅުއްވާލައްވަމުން ރައީސް ވިދާޅުވީ، އެ ދުވަހު ގައުމަށްޓަކައި ޝަހީދުވި މުޖާހިދުންގެ ހިތްޕުޅުގައި އޮތް އެންމެ ބޮޑު އެދުމަކީ މި އަމާން ވަތަން އެގޮތުގައި ދެމެހެއްޓުން ކަމަށެވެ. އެ ބޭފުޅުން އަމިއްލަ އާއިލާއާއި ޒަވާޖީ ހަޔާތަށްވުރެ ބޮޑަށް އިސްކަންދެއްވީ ގައުމީ މިނިވަންކަމާއި ރައްކާތެރިކަމަށް ކަމަށްވެސް ވިދާޅުވިއެވެ.
އެމަނިކުފާނު އިތުރަށް ވިދާޅުވީ، ގައުމަށް އިހުލާސްތެރިވެ ވަފާތެރިވުމުގެ ނަތީޖާއަކީ އަބަދުވެސް ބާއްޖަވެރިކަން ކަމަށާއި، ގައުމަށް ޣައްދާރުވުމުގެ ނަތީޖާއަކީ އަބާއްޖަވެރިކަން ކަމަށެވެ. މިއަދު ދިވެހިން މިނިވަންކަމުގެ އުފާ ލިބިގަންނަމުންދަނީ އެ ދުވަހުގެ ޝަހީދުން ވި ގުރުބާނީގެ ސަބަބުން ކަމަށްވެސް ރައީސް މުއިއްޒު ވިދާޅުވިއެވެ.












