އިގްތިސާދީ އިސްލާހުތައް ގެނައުމުގައި ނުކުޅެދި، ޑޮލަރުގެ ކަޅު ބާޒާރުގެ އަގު އިންތިހާއަށް އުފުލެމުންދާ ކަމަށް ބުނެ އިގްތިސާދީ ތަރައްގީއާއި ދަތުރުފަތުރާއި ވިޔަފާރިއާ ބެހޭ ވަޒީރު މުހައްމަދު ސައީދުގެ އިތުބާރު ނެތްކަމަށް ހުށަހަޅާފައިވާ މައްސަލަ ރައްޔިތުންގެ މަޖިލީހުގެ މާދަމާގެ ޖަލްސާއަށް އެޖެންޑާކޮށްފިއެވެ.
އިދިކޮޅު އެމްޑީޕީގެ ފަރާތުން މަޖިލީހަށް މި މައްސަލަ ހުށަހެޅީ ވަޒީރު ސައީދު ހަވާލުވެވަޑައިގެން ހުންނެވި ގާނޫނީ މަސްއޫލިއްޔަތުތަކާ ހިލާފުވެ، މަޖިލީހަށް ޖަވާބުދާރީވުމުގެ ފުރުސަތަށް ހުރަސްއަޅުއްވަމުންދާ ކަމަށް ތުހުމަތުކޮށެވެ.
އެމްޑީޕީން ހުށަހެޅި މައްސަލައިގައި ފާހަގަކޮށްފައިވާ ގޮތުގައި އިގްތިސާދީ ހާލަތު ރަނގަޅުކުރުމަށް އެދެވޭ އެއްވެސް ސިޔާސަތެއް ތަންފީޒުކުރެވިފައި ނެތުމުގެ ސަބަބުން ގައުމުގައި ޑޮލަރު ލިބުން ދަތިވެ، ކަޅު ބާޒާރުގައި ޑޮލަރެއްގެ އަގު ވަނީ 21 ރުފިޔާއަށް ވުރެ މައްޗަށް ގޮސްފައެވެ.
މީގެ އިތުރުން ދައުލަތުގެ މާލީ ހާލަތު ނާޒުކު ދަނޑިވަޅެއްގައި ރާއްޖޭން ބޭރުގައި ބޭއްވި އިންވެސްޓަރު ފޯރަމްތަކަށާއި ތަފާތު މަޝްރޫއުތައް އިފުތިތާހުކުރުމުގެ ރަސްމިއްޔާތުތަކަށް ދައުލަތުގެ ބޮޑެތި ފައިސާއާއި ވަސީލަތްތައް ނުބައްދަލު ގޮތެއްގައި ބޭނުންކޮށްފައިވާ ކަމަށްވެސް އެ މައްސަލައިގައި ބުނެފައިވެއެވެ.
