ޖިންސީ ގޯނާގެ މައްސަލައެއްގެ ތުހުމަތުގައި މާލެ ސިޓީ ކައުންސިލްގެ މާފަންނު ދެކުނު ދާއިރާގެ ކުރީގެ ކައުންސިލަރު މުހައްމަދު އައިމަން އިސްމާއިލް (އާނު) ހައްޔަރުކޮށްފިއެވެ.
އައިމަން ހައްޔަރުކޮށްފައިވާ ކަމަށް ބުނެ މީޑިއާތަކުގައި ދައުރުވަމުންދާ ޚަބަރުތަކާ ގުޅިގެން، ނޫސްވެރިން ސުވާލު ކުރުމުން ފުލުހުން ވަނީ އެކަން ކަށަވަރުކޮށްދީފައެވެ. ނޫސްވެރިޔަކު ކުރި ސުވާލަކަށް ޖަވާބު ދެމުން ފުލުހުންގެ ޚިދުމަތުން ބުނީ، ޖިންސީ ގޯނާގެ ތުހުމަތުގައި އޭނާ ހައްޔަރުކޮށްފައިވާ ކަމަށެވެ.
ނަމަވެސް، މި މައްސަލައާ ގުޅޭ އިތުރު ތަފުސީލެއް ފުލުހުން އަދި ހާމައެއް ނުކުރެއެވެ. މި ހާދިސާ ހިނގި ގޮތާއި، މައްސަލައިގެ އިތުރު ތަފުސީލު ހޯދުމަށް ފުލުހުން ދަނީ މި މައްސަލަ އިތުރަށް ތަހުގީގު ކުރަމުންނެވެ.
މުހައްމަދު އައިމަން އިސްމާއިލަކީ މާލެ ސިޓީ ކައުންސިލްގެ 3 ވަނަ ދައުރުގައި މާފަންނު ދެކުނު ދާއިރާގަ އެމްޑީޕީ ތަމްސީލުކުރި ކައުންސިލަރެވެ.
