މޯލްޑިވްސް އެކްސްޕޯގައި ރޭ ބޭއްވި ފޮތް ނެރުމުގެ ހަފްލާގައި، ލިޔުންތެރިޔާ މަރިޔަމް މޫސާގެ އައު ދިގު ވާހަކައިގެ އިތުރުން ކުޑަކުދިންނަށް ހާއްސަ ގިނަ ފޮތްތަކެއް ނެރެފިއެވެ.
ރޭ ބޭއްވި މި ހަރަކާތުގައި ވާހަކަދައްކަމުން މަރިޔަމް މޫސާ ބުނި ގޮތުގައި، އޭނާ އަލަށް ނެރުނު ބޮޑު ވާހަކައަކީ 1990 ގެ އަހަރުތަކުގެ ތެރޭގައި ހިނގާފައިވާ ހަގީގީ ހާދިސާތަކެއްގެ މައްޗަށް ބިނާކޮށް ލިޔެފައިވާ ވާހަކައެކެވެ. މި ވާހަކައިގައި ލޯތްބާއި ބޭވަފާތެރިކަމުގެ އިތުރުން، އަންހެން ކުއްޖެއްގެ ދިރިއުޅުމުގައި ކުރިމަތިވާނެ އެންމެ ބިރުވެރި ކަންކަން ހިމަނާފައިވާނެ ކަމަށް އޭނާ ފާހަގަކުރިއެވެ. އަދި މި ހާދިސާ ހިނގާފައިވަނީ ނޮވެމްބަރު މަހުގެ 4 ވަނަ ދުވަހެއްގައި ކަމަށްވެސް އޭނާ ބުންޏެވެ.
ދިވެހި އަދަބިއްޔާތަށް އިތުރު ބޮޅެއް! 📚✨
މަޝްހޫރު ލިޔުންތެރިޔާ މަރްޔަމް މޫސާގެ ގަލަމުން ލިޔުއްވި އައު ދިވެހި ވާހަކަފޮތް "ހިތްމޭގާ ރޯލީ އެހާ" އަދި ކުޑަކުދިންގެ ޚާއްޞަ ވާހަކަފޮތާއި މަސައްކަތުފޮތް ރަސްމީކޮށް ނެރުމަށް ބޭއްވި ހަފްލާގެ ތެރެއިން.. ލިޔުންތެރިޔާއަށް ހޫނު މަރުޙަބާއެއް… pic.twitter.com/JFSeRuAiJy
— eki (@eki_mv) November 2, 2026
ދިގު ވާހަކައިގެ އިތުރުން، ކުޑަކުދިންގެ ފޮތްތައް ލިޔުމަށް ވެސް ހާއްސަ ޝައުގުވެރިކަމެއް ހުންނަ ކަމަށް މަރިޔަމް މޫސާ ބުންޏެވެ. އޭނާ ބުނި ގޮތުގައި މީގެ ކުރިންވެސް ކުޑަކުދިންގެ ފޮތްތައް ލިޔެ، އެ ދާއިރާއިން ތަމްރީނުތަކާއި ވޯކްޝޮޕްތައް ފުރިހަމަކޮށްފައިވާތީ، މިފަހަރުގެ އެކްސްޕޯއަށްވެސް ވަނީ ކުޑަކުދިންނަށް ހާއްސަ ފޮތްތަކެއް ތައްޔާރުކޮށްފައެވެ.
އޭގެ ތެރޭގައި އެކްޓިވިޓީ ފޮތަކާއި، 5 އަހަރާއި 10 އަހަރާ ދެމެދުގެ ކުދިންނަށް ހާއްސަ ދެ ވާހަކަ ފޮތް ކަމަށްވާ ”އަމާންގެ ވެލާ“ އަދި ”ބިލާލްގެ ކަނޑުއަސް“ ހިމެނެއެވެ. މީގެ އިތުރުން 3 އަހަރާއި 5 އަހަރާ ދެމެދުގެ ކުޑަކުދިންނަށް އަމާޒުކޮށްގެން ތައްޔާރުކުރި ވާހަކަ ފޮތެއްވެސް މި ހަފްލާގައި ވަނީ ނެރެފައެވެ.
މަރިޔަމް މޫސާ އިތުރަށް ބުނި ގޮތުގައި، އަލަށް ނެރުނު ބޮޑު ވާހަކަ ފޮތަށް އާންމުންގެ ފަރާތުން ހީނުކުރާ ވަރުގެ ބޮޑު ތަރުހީބެއް ވަނީ ލިބިފައެވެ. އެގޮތުން އެކްސްޕޯ ފެށުމުގެ ކުރިން ޗާޕުކޮށްގެން ގެނައި ހުރިހާ ފޮތެއް ކަހަލަ ގޮތަކަށް ވިކި ހުސްވެފައިވާ ކަމަށާއި، މި ހަފްލާއަށް ގެނެވުނީ އެންމެ 25 ފޮތް ކަމަށް އޭނާ ފާހަގަކުރިއެވެ.
