ސަޢޫދީ ޢަރަބިއްޔާއާއި، ތުރުކީ އަދި ޕާކިސްތާނާ ދެމެދު ޤާއިމުކޮށްފައިވާ ’މައްކާ ޖޮއިންޓް ޑިފެންސް އެގްރީމަންޓް‘ (މައްކާ ދިފާޢީ އެއްބަސްވުން) ގައި ސޫރިޔާ ބައިވެރިވުމާ މެދު ދިމަޝްޤުގެ ސަރުކާރުން މަޝްވަރާކުރަމުންދާކަން ސޫރިޔާގެ ޚާރިޖީ ވަޒީރު އަސްޢަދު އަލް-ޝައިބާނީ ހާމަކުރައްވައިފިއެވެ.
ބަޙްރައިންގައި ބޭއްވުނު ’މަނާމާ ޑައިލޮގް 2026‘ ކޮންފަރެންސްގައި ވާހަކަދައްކަމުން ސޫރިޔާގެ ޚާރިޖީ ވަޒީރު އަސްޢަދު އަލް-ޝައިބާނީ ހާމަ ކުރިގޮތުގައި، ސަޢޫދީ ޢަރަބިއްޔާއާއި، ތުރުކީ އަދި ޕާކިސްތާނު ގުޅިގެން 2026 އޮގަސްޓް މަހު ސައިންކުރި މައްކާ ދިފާޢީ އެއްބަސްވުމުގައި ސޫރިޔާގެ ބައިވެރިވުމާ މެދު ސަރުކާރުގެ އެތެރޭގައި ދަނީ ދިރާސާތައް ކުރެވެމުންނެވެ. މިއީ އެއް ޤައުމަކަށް ދެވޭ ޙަމަލާއަކީ އެކުއެކީގައި ތިން ޤައުމަށް ދެވޭ ޙަމަލާއެއްގެ ގޮތުގައި ބަލާ، ނޭޓޯ ފަދަ އިއްތިހާދީ ދިފާޢީ އެއްބަސްވުމެކެވެ.
ރައީސް އަޙްމަދު އަލް-ޝަރާގެ ސަރުކާރުން ސަޢޫދީ ޢަރަބިއްޔާއާއެކު އޮންނަ ގުޅުން އިތުރަށް ބަދަހިކުރަމުންދާއިރު، ސޫރިޔާއަކީ ސަރަޙައްދީ ސަލާމަތުގެ މުހިންމު ބައެއްކަމަށް ޝައިބާނީ ބުންޏެވެ. އަދި ޔަމަނުގެ ހޫޘީންނާ ދެކޮޅަށް ސަޢޫދީއިން ވާގިވެރިވާ، ބައިނަލްއަޤްވާމީ ގޮތުން ޤަބޫލުކުރާ ޔަމަނު ސަރުކާރަށް ސޫރިޔާއިން ތާއިދުކުރާކަން އޭނާ ވަނީ ތަކުރާރުކޮށްފައެވެ.
ފާއިތުވި ދެ އަހަރު ދުވަހުގެ ތެރޭގައި އިޒްރޭލުން ސޫރިޔާގެ ސަރަޙައްދުތަކަށް 1,000 އަށްވުރެ ގިނަ ވައިގެ ހަމަލާ ދީފައިވާކަން ފާހަގަކުރަމުން، ސޫރިޔާގެ ސަރަޙައްދީ އިސްތިޤްލާލަށް ދުވަހުން ދުވަހަށް އަރައިގަންނަމުންދާއިރު، ހަތިޔާރުތައް ހަމައެކަނި ދައުލަތުގެ ބާރުގެ ދަށަށް ގެންނަން ބައިނަލްއަޤްވާމީ ފަރާތްތަކުން ގޮވާލާ ގޮވާލުމުގެ ބޭނުމަކީ ކޮބައިތޯ ޝައިބާނީ ސުވާލު އުފެއްދިއެވެ.
