ލޯކަލް ގަވަރމަންޓް އޮތޯރިޓީ (އެލްޖީއޭ) ގެ ބޯޑަށް މެންބަރުން އިންތިޚާބުކުރުމަށް ބާއްވާ ވޯޓުލުން މިއަދު ހެނދުނު 10:00 އިން ފެށިގެން ކުރިއަށް ގެންގޮސް ނިންމާލައިފިއެވެ.
މި އިންތިޚާބުގައި ވޯޓުލުމުގެ ޙައްޤު 807 ފަރާތަކަށް ލިބިގެންވާއިރު، އޭގެ ތެރޭގައި ހިމެނެނީ ކައުންސިލްތަކުގެ 625 ކައުންސިލަރުންނާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ 182 ރައީސުންނެވެ. ވޯޓުލުމުގެ ކަންކަން ހަވީރު 4:00 އާ ހަމައަށް ކުރިއަށްގެންދިޔައެވެ.
ލާމަރުކަޒީ ޤާނޫނުގައިވާ ގޮތުން އެލްޖީއޭގެ ބޯޑަށް ތިން މެންބަރުން އިންތިޚާބުކުރަންޖެހެއެވެ. ނަމަވެސް، ސިޓީ ކައުންސިލްތަކަށް ޚާއްޞަ ގޮނޑިއަށް ކުޅުދުއްފުށި ސިޓީގެ މޭޔަރު މުޙައްމަދު އާތިފް އެކަނި ކުރިމަތިލައްވާފައިވާތީ، އޭނާ ވަނީ ވާދަވެރިކަމަކާ ނުލައި އެ މަޤާމަށް އިންތިޚާބުވެވަޑައިގެންފައެވެ. މިއަދު ވޯޓުލުން ކުރިއަށްދަނީ ރަށު ކައުންސިލަރުންގެ ތެރެއިން އިންތިޚާބުކުރާ މެންބަރާއި، އަންހެނުންގެ ކޮމިޓީތަކުގެ ރައީސުންގެ ތެރެއިން ހޮވާ މެންބަރު ކަނޑައެޅުމަށެވެ.
އިންތިޚާބުގެ ވޯޓުލުން ކުރިއަށްދަނީ މާލޭގައި ހުންނަ އެލްޖީއޭ އޮފީހުގެ އިތުރުން، އަތޮޅުތަކުގައި ގާއިމުކޮށްފައިވާ ސަރުކާރުގެ ޚިދުމާތު މަރުކަޒުތަކާއި ހުޅުދޫ އިޖުތިމާޢީ މަރުކަޒު ހިމެނޭހެން ޖުމްލަ 19 ވޯޓުފޮއްޓެއްގައެވެ. ވޯޓުފޮށިތަކުގެ އޮފިޝަލުންގެ ގޮތުގައި ހަރަކާތްތެރިވަނީ އެލްޖީއޭ އާއި އެކި މަރުކަޒުތަކުގެ މުވައްޒަފުންނެވެ.
ދެ މަޤާމަށް ވޯޓުލުމަށް ތަފާތު ދެ ކުލައެއްގެ ވޯޓު ކަރުދާސް ދޫކުރި ނަމަވެސް، ދެ ކަރުދާސް ވެސް ވައްޓާލަންޖެހެނީ އެއް ވޯޓުފޮއްޓަކަށެވެ. ވޯޓުލުމަށް ކަނޑައެޅިފައިވާ ވަގުތު ތަންދީފި ނަމަވެސް، ގަޑި ހަމަވާއިރު ކިޔޫގައި ތިބޭ މީހުންނަށް ވޯޓުލުމުގެ ފުރުޞަތު ދޭނެ ކަމަށް އެލްޖީއޭއިން ބުނެއެވެ.
ވޯޓުލުން ނިންމައި ފޮށިތައް ބަންދުކުރާތާ 30 މިނެޓު ތެރޭގައި ވޯޓު ގުނަން ފަށާނެއެވެ. މިއަދުގެ ވޯޓުލުމަށްފަހު ވަގުތީ ނަތީޖާ މިރޭ އިއުލާންކުރުމަށް ހަމަޖެހިފައިވާއިރު، ދާއިމީ ނަތީޖާ އިއުލާންކުރާނީ އަންނަ ނޮވެމްބަރު މަހުގެ 3 ވަނަ ދުވަހުއެވެ.
