ނ. މަނަދޫގައި ޤާއިމުކުރާ ކީރިތި ޤުރުއާނާ ބެހޭ ޤައުމީ މަރުކަޒުގެ ގޮފީގެ އިމާރާތުގެ ފާރުތައް ރާނާ ނިމި، މުޅި މަޝްރޫޢުގެ 40 އިންސައްތަ މަސައްކަތް ނިމިފައިވާކަމަށް އިސްލާމިކް މިނިސްޓްރީން ހާމަކުރައްވައިފިއެވެ.
އިސްލާމިކް މިނިސްޓްރީގެ ދަށުން ކުރިއަށްގެންދާ މި މަޝްރޫޢުގެ އިމާރާތުގައި ހިމެނެނީ 3 ކިލާސް ރޫމާއި، ޒަމާނީ ލައިބްރަރީއެއްގެ އިތުރުން ކޮންފަރެންސް ރޫމެކެވެ.
މީގެއިތުރުން އިދާރީ މަސައްކަތްތަކަށް ޚާއްޞަ އޮފީސް ބަޔަކާއި، ކީރިތި ޤުރުއާން ހިފްޡުކޮށްފައިވާ މިންވަރު ޓެސްޓުކުރުމަށް ޚާއްޞަ ކުރެވިފައިވާ ބައެއްވެސް މި ޢިމާރާތުގައި ޤާއިމުކުރެވިގެންދާނެއެވެ.
މި މަޝްރޫޢަކީ އަތޮޅުތަކުގައި ކީރިތި ޤުރުއާން އުނގަންނައިދިނުމުގެ ފުރުޞަތުތައް ފުޅާކޮށް، ދީނީ ޢިލްމާއި ޤުރުއާނުގެ މަންހަޖު މުޅި ރާއްޖެއަށް އާންމުކުރުމަށް ސަރުކާރުން ކުރިއަށްގެންދާ މުހިންމު ސިޔާސަތުގެ ތެރެއިން ހިންގޭ މަޝްރޫޢެކެވެ.
މި މަރުކަޒުގެ މަސައްކަތް ނިމި ހުޅުވުމާއެކު، މަނަދޫގެ އިތުރުން ނޫނު އަތޮޅުގެ ރައްޔިތުންނަށް ޤުރުއާނުގެ ތަފާތު ކޯސްތަކާއި ހިފްޡު ކްލާސްތަކުގައި ބައިވެރިވުމުގެ ފުރުޞަތު ފުޅާދާއިރާއެއްގައި ލިބިގެންދާނެއެވެ.
