ޣައްޒާގެ އުތުރުގައި އިސްތިއުމާރީ ހަރުކަށި ފިކުރު ޔަހޫދީ ދައުލަތް، އިޒްރޭލުން ކަނޑައަޅާފައިވާ ’ރީނދޫ ރޮނގު‘ (ޔެލޯ އޭރިއާ) ކައިރީގައި ތިބި ހައްދުފަހަނައެޅި އިޒްރޭލު ސިފައިން، ޖަބާލިއާގެ އިރުމަތީގައިވާ ހަލާވާ ކޭމްޕްގައި ޖަހާފައިވާ ޓެންޓުތަކަށް ސީދާ ހަމަލާދީ ފަލަސްތީނުގެ މީހަކު ޝަހީދުކޮށްލައިފިއެވެ.
އަލްޖަޒީރާގެ އަޝްރަފް އަބޫ ޢަމްރާ ރިޕޯޓުކުރި ގޮތުގައި، ޖަބާލިއާގެ އިރުމަތީގައިވާ ’ރީނދޫ ރޮނގު‘ އިމުގައި ތިބި އިޒްރޭލު ޓެރަރިސްޓު އަސްކަރިއްޔާގެ ސިފައިން ވަނީ ގެދޮރުން ނެރެލާފައިވާ ފަލަސްޠީނު އާއިލާތައް ދިރިއުޅެމުންދާ ހަލާވާ ކޭމްޕްގެ ޓެންޓުތަކަށް ސީދާ ބަޑީގެ ހަމަލާތައް ދީފައެވެ. މިއީ ޣައްޒާގެ އުތުރުގައި ގެދޮރުގެއްލިފައިވާ މީހުން އެންމެ ގިނައިން ތިބި އެއް ކޭމްޕެވެ. މި ޙަމަލާގައި ފަލަސްތީނުގެ މީހަކު ޝަހީދުވެ، އިތުރު މީހުންނަށް ވަނީ އަނިޔާވެފައެވެ.
މީގެ އިތުރުން، ޣައްޒާ ސިޓީގެ ސަފްތާވީ ސަރަޙައްދުގައި ހުރި އާންމުންގެ ދިރިއުޅޭ ގެއަކަށް އިޒްރޭލުގެ ހަނގުރާމަމަތީ ބޯޓުތަކުން ވަނީ އިންޒާރު ދިނުމަށްފަހު ވައިގެ ޙަމަލާއެއް ދީ، އެ ގެ ބިމާހަމަކޮށްލާފައެވެ.
އިޒްރޭލުން ކަނޑައަޅާފައިވާ ރީނދޫ ރޮނގުގެ އިމުގައި ހުރި ކޭމްޕްތަކަށް ދެމުންދާ ޙަމަލާތައް ވަރުގަދަވަމުންދާއިރު، އާންމުންނަށް ރައްކާތެރިކަން ލިބޭނެ އެއްވެސް ސަރަޙައްދެއް އުތުރު ޣައްޒާގައި ނެތްކަން މީޑިއާ ރިޕޯޓުތަކުން ހާމަވެއެވެ.
