ހޮރްމޫޒް ކަނޑުއޮޅި 7 ދުވަހުގެ ތެރޭގައި ހުޅުވާލުމަށް އީރާނުން ހުށަހަޅާފައިވާ ޕްރޮޕޯޒަލްއާ ގުޅޭގޮތުން މެދުވެރިން މެދުވެރިކޮށް މަޝްވަރާތައް ކުރިއަށްދާކަމަށް އީރާނުގެ ޚާރިޖީ ވަޒީރު ޢައްބާސް ޢަރާޤްޗީ ބުނެފިއެވެ.
އީރާނުގެ ޚާރިޖީ ވަޒީރު ޢައްބާސް ޢަރާޤްޗީ ބުނި ގޮތުގައި، ހޮރްމޫޒް ކަނޑުއޮޅި ހުޅުވާލުމަށް އީރާނުން ހުށަހެޅި ޕްލޭން ތަންފީޛުކުރުމަށްޓަކައި ޤަޠަރާއި އޮމާން ފަދަ މެދުވެރިންނާއެކު ދަނީ މުވާޞަލާތު ކުރެވެމުންނެވެ. އީރާނުގެ ސެކިއުރިޓީ މަސްދަރުތަކުން މައުލޫމާތު ދޭޭގޮތުގައި، މައިގަނޑު މައްސަލައަކީ ދުވަސްތަކުގެ ޢަދަދެއް ނޫނެވެ. ނަމަވެސް އީރާނުން ހުށަހަޅާފައިވާ 7 ޝަރުޠު އެމެރިކާއިން ގަބޫލުކުރުމެވެ.
އެހެންނަމަވެސް، އެމެރިކާގެ ރައީސް ޑޮނަލްޑް ޓްރަމްޕް ވަނީ ނައިބު ރައީސް ޖޭޑީ ވޭންސް އަށް އީރާނާއެކު ސުލްޙައިގެ މަޝްވަރާތައް ފެށުމަށް އަމުރުކުރިކަމަށް ފެތުރޭ ޚަބަރުތައް ދޮގުކޮށްފައެވެ. ޓްރަމްޕް ބުނީ އީރާނާއެކު ދެކެވުނު ވާހަކަތަކަކީ ޞިއްޙީ އެހީތެރިކަން ފޯރުކޮށްދިނުމާ ގުޅޭގޮތުން ދެކެވުނު ވާހަކަތަކެއް ކަމަށެވެ.
އީރާނުގެ ސުޕްރީމް ލީޑަރު މުޖުތަބާ ޚާމަނާއީ ވަނީ، ހަނގުރާމަ ނިންމުމަށް އީރާނުން ހުށަހަޅާފައިވާ ޝަރުޠުތަކަށް އެއްވެސް ދުލެއް ނުދޭނެކަމުގެ އިޝާރާތެއް ދީފައެވެ. އަދި ހޮރްމޫޒް ކަނޑުއޮޅީގެ ފުރިހަމަ ކޮންޓްރޯލް ދެމެހެއްޓުމަށާއި ’އެކްސިސް އޮފް ރެސިސްޓެންސް‘ ގެ މަޞްލަޙަތު ރައްކާތެރިކުރުމަށް ސެކިއުރިޓީ ޗީފް މުޙްސިން ރެޟާއީއަށް އޭނާ އިރުޝާދު ދިނެވެ. އީރާނުގެ ރައީސް މަސްޢޫދު ޕެޒެޝްކިއާން ވަނީ ސަރުކާރުން މި އިރުޝާދުތަކަށް ތަބާވާނެކަމަށް ބުނެފައެވެ.
