ހޮރްމޫޒް ކަނޑުއޮޅީގައި ޙަމަލާއެއް އަމާޒުވެ ގެއްލުންވި ތެޔޮ މަނަވަރަކުން ކަނޑަށް ބޭރުވި ތެޔޮގަނޑު ޔޫއޭއީ އުތުރުގެ ގޮނޑުދޮށްތަކަށް ފޯރަން ފެށުމުން، ރައުސް އަލް-ޚައިމާ އެމިރޭޓްގެ ހުރިހާ ގޮނޑުދޮށްތަކެއް ވަގުތުން ބަންދުކޮށްފިއެވެ.
ހޮރްމޫޒް ކަނޑުއޮޅީގައި ދިން ޙަމަލާތަކުގައި ގެއްލުންވި ތެޔޮ ބޯޓަކުން ކަނޑަށް އޮއްސުނު ސާފުނުކުރާ ކަޅުތެޔޮތައް، އޮއިވަރާއެކު ދަތުރުކޮށް ޔޫއޭއީގެ ރައުސް އަލް-ޚައިމާގެ ގޮނޑުދޮށްތަކަށް ވަނީ ފޯރާފައެވެ. މިކަމާ ގުޅިގެން ޔޫއޭއީގެ ތިމާވެށި ރައްކާތެރިކުރުމާ ބެހޭ އިދާރާއިން ވަނީ އާންމުންގެ ސިއްޙީ ރައްކާތެރިކަމަށްޓަކައި އަތިރިމަތީގެ ހުރިހާ ސަރަޙައްދުތަކާއި، ރިސޯޓުތަކުގެ ގޮނޑުދޮށްތައް އަދި މަސްވެރިންގެ ބަނދަރުތައް ވަކި ގޮތެއް އަންގަންދެން ބަންދުކުރުމަށް އަމުރުކޮށްފައެވެ.
ކަނޑަށް ފެތުރެމުންދާ ތެޔޮގަނޑުގެ ސަބަބުން ކަނޑުގެ ދިރުންތަކަށާއި، ކަނޑުއޮޅިތަކުގައިވާ ކަނޑޫފާތަކަށް ބޮޑެތި ގެއްލުންތަކެއް ލިބެމުންދާއިރު، ސަރުކާރުން ދަނީ ކަނޑުފެން މީރުފެނަށް ބަދަލުކުރާ (ޑީސެލިނޭޝަން) މަރުކަޒުތަކުގެ ފީޑަރ ހޯސްތަކަށް ތެޔޮ ނުވަންނާނެހެން ވަގުތީ ބޫމްސް (ފްލޯޓިންގ ބެރިއަރ) ޖަހައިގެން ރައްކާތެރިކަމުގެ ފިޔަވަޅުތައް އަޅަމުންނެވެ.
ހޮރްމޫޒް ކަނޑުއޮޅީގައި ތެޔޮ ބޯޓުފަހަރަށް ދެމުންދާ ޙަމަލާތަކުގެ ސަބަބުން އިޤްތިޞާދީ އަދި އަސްކަރީ ނުރައްކާތަކުގެ އިތުރުން، ފާރިސީ ކަނޑުގެ ތިމާވެއްޓަށް ބޮޑެތި ގެއްލުންތަކެއް ލިބެމުންދާތީ، ސަރަޙައްދީ ތިމާވެށީގެ ޖަމްޢިއްޔާތަކުން ދަނީ ކަންބޮޑުވުން ފާޅުކުރަމުންނެވެ.
