ތަހުގީގީ އިދާރާއަކުން ޖިނާއީ ކުށެއް ސާބިތުކޮށްދީފިނަމަ، އެ ކުށެއްގައި ބައިވެރިވި ކޮންމެ މުވައްޒަފަކާމެދުވެސް އެއްވެސް އިސްތިސްނާއެއް ނެތި ގަވާއިދުން އެޅެން އޮތް އެންމެ ހަރުކަށި ފިޔަވަޅު އަޅާނެ ކަމުގެ ޔަގީންކަން ވެސްޓް މެނޭޖްމަންޓް ކޯޕަރޭޝަން (ވެމްކޯ) އިން ދީފިއެވެ.
ވެމްކޯއިން މިހެން ބުނެފައިވަނީ ގދ. ތިނަދޫގައި ހިނގި ރޭޕްގެ ހާދިސާއާ ގުޅުވައިގެން، އެ ކޯޕަރޭޝަންގެ މުވައްޒަފަކު ހިމެނޭ ކަމަށް ބުނެ ސޯޝަލް މީޑިއާގައި ތަފާތު ވާހަކަތައް ފެތުރެމުންދާ ދަނޑިވަޅުގައި ނެރުނު ނޫސް ބަޔާނެއްގައެވެ.
އެ ކުންފުނީގެ ބަޔާނުގައި ފާހަގަކޮށްފައިވަނީ، މަސައްކަތުގެ މާހައުލުގައި އަދި މަސައްކަތުން ބޭރުގައިވެސް މުވައްޒަފުންގެ އަހްލާގީ މިންގަނޑު މަތީ ދަރަޖައެއްގައި ހިފެހެއްޓުމަކީ ކުންފުނީގެ އުސޫލުތަކުގެ އެންމެ އަސާސީ މަގުސަދު ކަމަށެވެ. އަދި ކުންފުނީގެ ޕޮލިސީތައް ފަރުމާކުރެވިފައިވަނީ ނޭއްގާނީ އަދި ޖިނާއީ ކުށްތަކަށް އެއްވެސް ޖާގައެއް ނުލިބޭ ގޮތަށް ކަމަށްވެސް ބުނެފައިވެއެވެ.
ޖިނާއީ ކުށެއްގެ މައްސަލައެއް ތަހުގީގީ އިދާރާއަކުން ބަލައި ސާބިތުވާކަމަށް ކަނޑައަޅައިފިނަމަ، ކުންފުނީގެ ވަޒީފާއާ ބެހޭ ގަވާއިދުގެ ތެރެއިން އެޅެން އޮތް އެންމެ ބޮޑު ފިޔަވަޅެއް އެ މީހަކާމެދު އަޅާނެ ކަމަށް ވެމްކޯއިން ޔަގީންކޮށްދެއެވެ.
މީގެ އިތުރުން، ތިނަދޫގައި ހިނގާދިޔަ ބަދުއަހްލާގީ އަނިޔާވެރި އަމަލު އެންމެ ހަރުކަށި އިބާރާތުން ކުށްވެރިކޮށް، އެފަދަ ގާނޫނާ ހިލާފު ލާއިންސާނީ ކަންކަމަށް ވެމްކޯއިން އެއްވެސް ޖާގައެއް ނުދޭނެ ކަމަށް އެ ކޯޕަރޭޝަނުން ބުންޏެވެ.













