މިއަހަރުގެ މިހާތަނަށް އިންޑިއާއިން ރާއްޖެއަށް ލައްކައަކަށްވުރެ ގިނަ ފަތުރުވެރިން ޒިޔާރަތްކޮށްފައިވާއިރު، އެޤައުމުވަނީ ރާއްޖެއަށް އެންމެ ގިނަ ފަތުރުވެރިން ޒިޔާރަތްކުރި ޤައުމުތަކުގެ 6 ވަނައިގައި ހިމެނިފައެވެ.
ފަތުރުވެރިކަމާ ބެހޭ ވުޒާރާގެ ތަފާސްހިސާބުތައް ދައްކާގޮތުން މިއަހަރުގެ ނޮވެމްބަރު މަހުގެ ނިޔަލަށް ރާއްޖެއަށް ޖުމްލަ 1.7 މިލިޔަން ފަތުރުވެރިން ވަނީ ޒިޔާރަތްކޮށްފައެވެ. މިދިޔަ އަހަރުގެ މި މުއްދަތާ އަޅާބަލާއިރު މިއީ %1.8 ގެ ދަށްވުމެއް ކަމަށް އެވުޒާރާގެ ތަފާސްހިސާބުތަކުން ދައްކައެވެ.
މި އަދަދުތަކުގެ ތެރެއިން އިންޑިއާއިން އެކަނިވެސް 100،435 ފަތުރުވެރިން ރާއްޖެއަށް ޒިޔާރަތްކޮށްފައިވެއެވެ. މިއަހަރުގެވެސް އަދި މިދިޔަ އަހަރުގެވެސް ތަފާސްހިސާބުތަކަށް ބަލާއިރު އިންޑިއާ ހިމެނެނީ ރާއްޖެއަށް 6ވަނަ އަށް އެންމެ ގިނަ ފަތުރުވެރިން ޒިޔާރަތްކުރާ ޤައުމުގެ ގޮތުގައެވެ.
ރާއްޖެއަށް ލައްކައަކަށްވުރެ ގިނަ ފަތުރުވެރިން މިހާތަނަށް ޒިޔާރަތްކޮށްފައިވާ އެހެން ޤައުމުތަކުގެ ތެރޭގައި ހިމެނެނީ:
ޗައިނާ: 326،741 ފަތުރުވެރިން
ރަޝިއާ: 248،739 ފަތުރުވެރިން
އިނގިރޭސިވިލާތް: 131،996 ފަތުރުވެރިން
ޖަރުމަނުވިލާތް: 115،814 ފަތުރުވެރިން
އިޓަލީވިލާތް: 103،504 ފަތުރުވެރިން
ސަރުކާރުން ދަނީ ދުނިޔޭގެ އެކި ސަރަހައްދުތަކުގައި ރާއްޖެ އިޝްތިހާރުކުރުމުގެ ގިނަ މަސައްކަތްތަކެއް ކުރައްވަމުންނެވެ. އެގޮތުން ރޯޑްޝޯތަކާއި ބައިނަލްއަޤުވާމީ ފެއަރތަކުގައި ބައިވެރިވެ ރާއްޖޭގެ ފަތުރުވެރިކަމުގެ ސިނާއަތު އިޝްތިހާރުކުރުމުގެ މަސައްކަތް ދަނީ ކުރަމުންނެވެ. މިފަދަ މަސައްކަތްތަކުގެ ސަބަބުން ދުނިޔޭގެ އެކި ކަންކޮޅުތަކުން ރާއްޖެއަށް ފަތުރުވެރިން ޒިޔާރަތްކުރުން އިތުރުވެގެންދާނެ ކަމަށް ބެލެވެއެވެ.
މިވަގުތައް ބަލާއިރު ރާއްޖޭގައި ފަތުރުވެރިންނަށް ޚިދުމަތް ދިނުމަށްޓަކައި 1296 ތަނެއް ވަނީ ހުޅުވާފައެވެ. މިތަންތަނުގެ ބެޑް ކެޕޭސިޓީ 68،243 އަށް އަރާކަމަށް ފަތުރުވެރިކަމާ ބެހޭ ވުޒާރާގެ ތަފާސްހިސާބުތައް ދައްކައެވެ.
