ދިވެހިރާއްޖޭގެ ތައުލީމީ ނިޒާމަށް ދިމާވާ ދަތިތައް ހައްލުކޮށް، މި ނިޒާމު އިތުރަށް ހަރުދަނާކުރުމަށްޓަކައި، ތައުލީމުގެ ގާނޫނަށް ޖުމްލަ 42 އިސްލާހެއް ރައްޔިތުންގެ މަޖިލީހަށް ހުށަހަޅައިފިއެވެ. ސަރުކާރުގެ ފަރާތުން މި ބިލް މަޖިލީހަށް ހުށަހެޅުއްވީ ހުރާ ދާއިރާގެ މެންބަރު އަނާރާ ނައީމެވެ.
މި އިސްލާހުތަކުގެ އެއް މައިގަނޑު ބޭނުމަކީ، ނުކުޅެދުންތެރިކަން ހުންނަ ކުދިންނަށާއި ނަފްސާނީ ގޮތުން ހާއްސަ ހާލަތްތަކުގައި ތިބޭ ކުދިންނަށް، އެކުދިން ދިރިއުޅޭ ގޭގައި މަދަރުސީ ތައުލީމު ހާސިލުކުރުމުގެ ފުރުސަތު ފަހިކޮށްދިނުމެވެ. އެގޮތުން، ”ހޯމް ސްކޫލިން“ ޕްރޮގްރާމެއް ތައުލީމުގެ ގާނޫނުގައި ތައާރަފްކުރުމަށް މި ބިލްގައި ހުށަހަޅާފައިވެއެވެ.
މީގެއިތުރުން، މަދަރުސީ ތައުލީމީ ނިޒާމު ހިންގައި ތަންފީޒުކުރުމުގައި ބެލެނިވެރިންނާއި މުދައްރިސުންނާއި ޕްރިންސިޕަލުންގެ ދައުރު އިތުރަށް ތަފްސީލުކުރުމާއި، ކުއްޖާގެ އުމުރުގެ ޅަފަތުގައި ނުކުޅެދުންތެރިކަމަށް ރިއާޔަތްކޮށް އެހެން ކުދިންނާ ތަފާތުކުރުމެއްނެތި ތައުލީމު ހާސިލުކުރެވޭނެ އުސޫލުތައް ކަނޑައެޅުމަށްވެސް މި ބިލްގައި ހިމެނެއެވެ.
އަދި ސަރުކާރުގެ ކޮންމެ ސްކޫލަކުން ކޮންމެ ދުވަހަކުވެސް ނާސްތާ ލިބުމަށް ދަތިވާ ކުދިންނަށް ހިލޭ ނާސްތާ ފޯރުކޮށްދިނުމަށް ގާނޫނުގެ 23 ވަނަ މާއްދާއަށް އިސްލާހެއް ހުށަހަޅާފައިވެއެވެ. މީގެ އިތުރުން މުދައްރިސުންނާއި ސްކޫލުގެ އިސްފަރާތްތަކަށް އިހްތިރާމްކުރުމާއި، ސްކޫލް މާހައުލުގެ އަމާންކަން ގެއްލޭފަދަ ކަންކަމުގައި ބައިވެރިނުވުމަށް ދަރިވަރުން އަހުލުވެރިކުރުމަށް ބާރުއަޅާ އާ މާއްދާތަކެއްވެސް ހިމެނެއެވެ.
