33 ވަނަ އަހަރީ ވޯލްޑް ޓްރެވަލް އެވާޑްސްގެ ދުނިޔޭގެ ފެންވަރުގެ ދެ އެވާޑަކަށް ރާއްޖޭގެ މައި ދޮރާށި ކަމަށްވާ ވެލާނާ އިންޓަނޭޝަނަލް އެއާޕޯޓު (ވީއައިއޭ) ނޯމިނޭޓްވެއްޖެއެވެ.
މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން މައުލޫމާތު ދޭ ގޮތުގައި ވީއައިއޭ ނޯމިނޭޓްވެފައިވަނީ ދުނިޔޭގެ އެންމެ ފާހަގަކޮށްލެވޭ އެއާޕޯޓުގެ އެވާޑް (World’s Leading Airport 2026) އަދި ކަސްޓަމަރުންގެ ތަޖުރިބާއަށް އެންމެ ރަނގަޅު އެއާޕޯޓުގެ އެވާޑް (World’s Leading Airport – Customer Experience 2026) އަށެވެ.
ކަސްޓަމަރުންގެ ތަޖުރިބާގެ ކެޓަގަރީން ވީއައިއޭއާ ވާދަކުރާ ބައިނަލްއަގުވާމީ މަޝްހޫރު އެއާޕޯޓުތަކުގެ ތެރޭގައި ސިންގަޕޫރުގެ ޗާންގީ އެއާޕޯޓާއި، ދުބާއީ އިންޓަނޭޝަނަލް އެއާޕޯޓުގެ އިތުރުން ތުރުކީގެ އިސްތަންބޫލް އެއާޕޯޓާއި، އަބޫދާބީގެ ޒައިދު އިންޓަނޭޝަނަލް އެއާޕޯޓު ހިމެނެއެވެ.
މި ނޯމިނޭޝަންތައް ވީއައިއޭއަށް ލިބިފައިވަނީ ނިމިދިޔަ ސެޕްޓެމްބަރު މަހު ރާއްޖޭގައި ބޭއްވި ވޯލްޑް ޓްރެވަލް އެވާޑްސްގެ އިންޑިއަން އޯޝަން ގާލާގައި އިންޑިއާ ކަނޑުގެ ސަރަހައްދުގެ އެންމެ ފާހަގަކޮށްލެވޭ އެއާޕޯޓުގެ މަގާމު ވީއައިއޭއިން ކާމިޔާބުކޮށްފައި ވަނިކޮށެވެ.
އެމްއޭސީއެލްއިން ފާހަގަކުރި ގޮތުގައި މިފަދަ ބައިނަލްއަގުވާމީ ޝަރަފުވެރި އެވާޑްތަކަށް ވީއައިއޭ ނޯމިނޭޓްވުމަކީ، އެއާޕޯޓުގެ ޚިދުމަތްތައް ތަރައްގީކޮށް ފުޅާކުރުމަށާއި، ދަތުރުވެރިންނަށް ދެވޭ ޚިދުމަތުގެ ފެންވަރު މަތީ ދަރަޖައަކަށް އުފުލުމަށް ކުރެވެމުންދާ މަސައްކަތްތަކަށް ލިބުނު ބޮޑު ހިތްވަރެކެވެ.
މި އެވާޑްތަކަށް ވޯޓުލުން އޮކްޓޯބަރު 30 ގެ ނިޔަލަށް ހުޅުވާލެވިފައިވާއިރު، ފަތުރުވެރިކަމުގެ ދާއިރާގެ ހިދުމަތްތެރިންނާއި އާންމުންނަށް ވޯލްޑް ޓްރެވަލް އެވާޑްސްގެ ރަސްމީ ވެބްސައިޓު މެދުވެރިކޮށް ވޯޓު ދިނުމުގެ ފުރުސަތު ވަނީ ހުޅުވާލެވިފައެވެ.
