ސައުތު ސެންޓްރަލް ޕޮލިސް ރީޖަންގައި ހިމެނޭ ރަށެއްގެ ސްކޫލެއްގައި ތަޢުލީމު ހާސިލުކުރަމުންދާ ދަރިވަރުންތަކަކަށް ޖިންސީ ގޯނާކުރި ކަމުގެ ތުހުމަތުގައި ބިދޭސީ ދެ ޓީޗަރަކު ކޯޓު އަމުރެއްގެ ދަށުން ފުލުހުންގެ ބެލުމުގެ ދަށަށް ގެންގޮސްފިއެވެ.
ފުލުހުންގެ މީޑިއާ އޮފިޝަލު މަޢުލޫމާތު ދެއްވި ގޮތުގައި، އުމުރުން 16 އަހަރުގެ އަންހެން ކުއްޖަކަށް ޖިންސީ ގޯނާކުރި ކަމަށް ތުހުމަތުކުރެވޭ މައްސަލައެއް މި މަހުގެ 11 ވަނަ ދުވަހު ވަނީ ފުލުހުންނަށް ހުށަހަޅާފައެވެ. އެ މައްސަލައާ ގުޅިގެން ކޯޓު އަމުރެއްގެ ދަށުން މި މަހުގެ 14 ވަނަ ދުވަހު ހައްޔަރުކޮށްފައިވަނީ އުމުރުން 52 އަހަރުގެ ބިދޭސީ ފިރިހެނެކެވެ. ގްރޭޑް 10 އަށް ހިސާބު ކިޔަވައިދެމުންދިޔަ އެ ޓީޗަރުގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން ވަނީ 15 ދުވަހުގެ ބަންދުގެ މުއްދަތެއް ދީފައެވެ.
މީގެ އިތުރުން، އުމުރުން 12 އަހަރާއި 13 އަހަރާ ދެމެދުގެ އަންހެން ކުއްޖަކަށް ޖިންސީ ގޯނާކުރި ކަމުގެ މައްސަލައެއް މި މަހުގެ 17 ވަނަ ދުވަހު ފުލުހުންނަށް ރިޕޯޓުކުރުމާ ގުޅިގެން، އެ މައްސަލައިގައިވެސް 52 އަހަރުގެ ބިދޭސީ އިތުރު ފިރިހެން ޓީޗަރަކު ވަނީ މިދިޔަ ހުކުރު ދުވަހު ހައްޔަރުކޮށްފައެވެ. ދަށް ގްރޭޑްތަކަށް އިނގިރޭސި ކިޔަވައިދެމުންދިޔަ އެ ޓީޗަރުގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، ތަހުގީގު ކުރިއަށް ގެންދިއުމަށްޓަކައި 30 ދުވަހުގެ ބަންދުގެ މުއްދަތެއް ކޯޓުން ވަނީ ދީފައެވެ.
އެ ރަށުން ވާހަކަދެއްކި އާންމު ރައްޔިތަކު ހާމަކުރި ގޮތުގައި، ހައްޔަރުކުރެވުނު ދެ ޓީޗަރުންނަކީވެސް އެ ރަށު ސްކޫލުގައި ގިނަ އަހަރުތަކެއް ވަންދެން މަސައްކަތްކޮށްފައިވާ ދެ މީހުންނެވެ. އަދި އެ ދެ މީހުން ދަރިވަރުންނަށް ޖިންސީ ގޯނާކުރަމުންދާތާ އެތައް ދުވަހެއް ވެފައިވާ ކަމަށާއި، މިފަހަރު އެ މީހުން ހައްޔަރުކުރީ ބޮޑު މައްސަލައެއް ފެންމަތިވުމާ ގުޅިގެން ކަމަށްވެސް އޭނާ ބުނެފައިވެއެވެ.
