އަންނަ މަހު ބާއްވާ އޭއެފްސީ 17 އަހަރުން ދަށުގެ އޭޝިއަން ކަޕް ކޮލިފައިން މުބާރާތަށް ތައްޔާރުވުމުގެ ގޮތުން ފަލަސްތީނުގެ 17 އަހަރުން ދަށުގެ ގައުމީ ފުޓްބޯޅަ ޓީމު ހާއްސަ ތަމްރީނު ކޭމްޕެއް ފެށުމަށް މި މަހުގެ 27 ވަނަ ދުވަހު ރާއްޖެ އައުމަށް ވަނީ ހަމަޖެހިފައެވެ.
ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން މަޢުލޫމާތު ދޭ ގޮތުގައި، ދިވެހި ސަރުކާރުގެ ބޮޑު އެހީތެރިކަމާއެކު ކުރިއަށްގެންދާ މި ދަތުރުގައި ފަލަސްތީނު ޓީމު ކޭމްޕު ކުރުމަށް ހަމަޖެހިފައިވަނީ ކ. ގުރައިދޫގައެވެ.
މި ތަމްރީނު ކޭމްޕުގެ ތެރެއިން ފަލަސްތީނުގެ ޒުވާން ޓީމުން ރާއްޖޭގެ 17 އަހަރުން ދަށުގެ ގައުމީ ޓީމާ ދެކޮޅަށް އެކުވެރިކަމުގެ ދެ މެޗެއް ކުޅުމަށް ވަނީ ރޭވިފައެވެ. އެގޮތުން ފުރަތަމަ މެޗު އަންނަ ހުކުރު ދުވަހު ކުޅުމަށް ހަމަޖެހިފައިވާއިރު، ދެވަނަ މެޗު ކުޅޭނީ އަންނަ މަހުގެ ދެވަނަ ދުވަހުއެވެ.
މި މެޗުތަކަކީ ކޮލިފައިންއަށް ތައްޔާރުވަމުން އަންނަ ދިވެހިރާއްޖޭގެ ޒުވާން ޓީމަށްވެސް ބައިނަލްއަގުވާމީ މުހިންމު ތަޖުރިބާތަކެއް ލިބިގެންދާނެ މެޗުތަކެކެވެ. މީގެއިތުރުން މިއީ ދެ ގައުމުގެ މެދުގައި އޮތް ބަދަހި ގުޅުން އިތުރަށް ހަރުދަނާވެގެންދާނެ ކަމެއް ކަމަށްވެސް އެފްއޭއެމުން ފާހަގަކުރެއެވެ.
މި ކޭމްޕު އިންތިޒާމުކުރުމުގައި ދިވެހި ސަރުކާރާއި ކ. ގުރައިދޫ ކައުންސިލުން ވެދެއްވި އެހީތެރިކަމާއި ދެއްވި އެއްބާރުލުމަށް އެފްއޭއެމުން ވަނީ ޚާއްސަ ޝުކުރެއް އަދާކޮށްފައެވެ.
ފަލަސްތީނުގެ 17 އަހަރުން ދަށުގެ ޓީމު ރާއްޖޭގައި ކުރިއަށްގެންދާ ތަމްރީނު ކޭމްޕު ނިންމާލުމަށްފަހު އެނބުރި ގައުމަށް ފުރުމަށް ހަމަޖެހިފައިވަނީ އަންނަ މަހުގެ ފަސްވަނަ ދުވަހުއެވެ.
މީގެ ކުރިންވެސް ފަލަސްތީނުގެ ޒުވާން ޓީމުތަކާއި ސީނިއާ ފުޓުބޯޅަ ޓީމު ވަނީ ރާއްޖޭގައި ތަމްރީނުތަކާއި މެޗުތައް ކުޅެފައެވެ. އެގޮތުން 17 އަހަރުން ދަށުގެ ޓީމުން ވަނީ މިދިޔަ އަހަރުގެ ފަހުކޮޅުވެސް ރާއްޖޭގައި ތަމްރީނު ކޭމްޕެއް ކުރިއަށްގެންގޮސްފައެވެ.
