ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމާ ހަވާލުވެވަޑައިގަތުމަށްފަހު އެކަށައެޅުއްވި މާލީ އިސްލާހީ އެޖެންޑާގެ ހެޔޮ ނަތީޖާ ފެންނަން ފަށާފައިވާ ކަމަށް މާލީ ކަންކަމާ ބެހޭ ވަޒީރު ވިދާޅުވެއްޖެއެވެ.
ވަޒީރު މިހެން ވިދާޅުވީ މިއަދު ފެށި ”މޯލްޑިވްސް އެކައުންޓެންޓްސް ފޯރަމް“ ގައި ވާހަކަފުޅު ދައްކަވަމުންނެވެ.
ވަޒީރުގެ ވާހަކަފުޅުގައި ފާހަގަކުރެއްވި ގޮތުގައި، ނޮވެމްބަރު 2023 ގައި ރައީސް ޑރ. މުޢިއްޒު ވެރިކަމާ ހަވާލުވެވަޑައިގަތުމަށްފަހު، ރާއްޖެއަށް އެކަށޭނަ، އަމިއްލަ މާލީ އިސްލާހީ ފިޔަވަޅުތަކެއް އެޅުމަށް ސަރުކާރުން އިސްނެންގެވިއެވެ. މި އިސްލާހީ އެޖެންޑާގެ މައިގަނޑު އަމާޒަކީ ދައުލަތަށް ލިބޭ އާމްދަނީ އިތުރުކުރުމާއި، ދަރަނި ދެމެހެއްޓެނިވި މިންގަނޑެއްގައި ބެހެއްޓުމެވެ. މި މަސައްކަތްތަކުގެ ނަތީޖާ މިހާރު ވެސް އަމަލީ ގޮތުން ފެންނަމުންދާ ކަމަށް ވަޒީރު ވިދާޅުވިއެވެ.
މިގޮތުން ވޭތުވެދިޔަ ދެ އަހަރާއި ބައިގެ ތެރޭގައި ސަރުކާރުން ވަނީ 1.4 ބިލިއަން އެމެރިކާ ޑޮލަރަށް ވުރެ ބޮޑު އަދަދެއް ދަރަނި ދެއްކުމަށް ހޭދަކޮށްފައެވެ. މިއީ ރާއްޖޭގެ ތާރީޚުގައި ވެސް މިހާތަނަށް ދަރަނި އަދާކުރުމަށް އެންމެ ބޮޑު ހޭދައެއް ކުރެވުނު މުއްދަތުކަން ވަޒީރު ފާހަގަކުރެއްވިއެވެ.
ވަޒީރު އިތުރަށް ވިދާޅުވީ، ދަރަނި އަދާކުރުމަކީ ހާސިލުކުރެވުނު މުހިންމު ކާމިޔާބީއެއް ނަމަވެސް، ހަގީގީ އިގްތިސާދީ ވިލުންތެރިކަމަކީ ހަމައެކަނި ކުރިމަތިވެފައިވާ މާލީ ޒިންމާތައް އަދާކުރުން އެކަނި ނޫން ކަމަށެވެ. އަދި ހަގީގީ ވިލުންތެރިކަމަކީ ކުރިމަތިވެދާނެ އިގްތިސާދީ ލޮޅުންތަކުން އަރައިގަނެވޭނެ ފަދަ ވަރުގަދަ އިގްތިސާދެއް ބިނާކުރުން ކަމަށާއި، އެކަން ހާސިލުވާނީ ދައުލަތުގެ މާލިއްޔަތު ހަރުދަނާކޮށް ބެލެހެއްޓުމާއި، އިތުބާރު ހުރި މާލީ ހިސާބުތައް ބެލެހެއްޓުމުގެ އިތުރުން ޖަވާބުދާރީވުން ވަރުގަދަކޮށްގެން ކަމަށް ވަޒީރު ވިދާޅުވިއެވެ.
