ރާއްޖޭގެ މަގުބޫލު އޮންލައިން ނޫސް ”ވަގުތު“ ގެ މުވައްޒަފުންގެ މުސާރައިގެ އައު އޮނިގަނޑު އެކުލަވާލައި، އެ ނޫހުގެ މުވައްޒަފަކަށް ލިބޭނެ އެންމެ ދަށް މުސާރައަކީ 21،000 ރުފިޔާ ކަމުގައި ހަމަޖައްސައިފިއެވެ.
މިކަން ހާމަކުރައްވައި ”ވަގުތު“ ނޫހުގެ މެނޭޖްމެންޓުން ބުނީ، މުސާރައިގެ އައު އޮނިގަނޑަށް އަމަލުކުރަން ފަށާނީ 21 ޖެނުއަރީ 2027 ގައި ކަމަށެވެ. މީގެކުރިން އެ ނޫހުގެ މުވައްޒަފުންގެ އެންމެ ދަށް މުސާރައިގެ ގޮތުގައި ކަނޑައަޅާފައި އޮތީ 15،000 ރުފިޔާއެވެ. އެހެންކަމުން މިއީ އެ ނޫހުގެ މުވައްޒަފުންގެ މުސާރައަށް އައި ފާހަގަކޮށްލެވޭ ބޮޑު ކުރިއެރުމެކެވެ.
ވަގުތު މެނޭޖްމެންޓުން އިތުރަށް ބުނި ގޮތުގައި، މުސާރައަށް ގެނައި މި ”ބޮޑު ބަދަލު“ ގެ ތަފުސީލުތައް ހިމެނޭ ލިޔުންތައް މިހާރު ވަނީ ހުރިހާ މުވައްޒަފުންނާ ހިއްސާކޮށް، ސިޓީ ފޮނުވާފައެވެ.
މި ބަދަލަކީ ނޫސްވެރިކަމުގެ ދާއިރާގައި މަސައްކަތްކުރާ މުވައްޒަފުންގެ ދިރިއުޅުމުގެ ފެންވަރު މަތިކޮށް، މުވައްޒަފުންގެ އަގު ވަޒަންކުރުމުގެ ގޮތުންނާއި، ވާދަވެރި މާހައުލެއްގައި ހުނަރުވެރި މުވައްޒަފުން ދެމެހެއްޓުމަށްޓަކައި އެޅި މުހިންމު ފިޔަވަޅެއް ކަމަށް ވަގުތު ނޫހުން ދެކެއެވެ.
މިއާއެކު، ވަގުތު ވެގެންދާނީ ރާއްޖޭގެ މީޑިއާތަކުގެ ތެރެއިން މުވައްޒަފުންނަށް އެންމެ އެކަށޭނަ އަދި އެންމެ އެދެވޭ އުޖޫރައެއް ދޭ އެއް މީޑިއާއަށެވެ.
