ކުރިއަށް އޮތް ފިނި މޫސުމުގައި ރާއްޖެއަށް އަންނަ ފަތުރުވެރިންގެ އަދަދު އިތުރުވެ، އެއާޕޯޓުގެ ކިއުތައް ދިގުވުން ކުޑަކުރުމުގެ ގޮތުން ވެލާނާ އިންޓަރނޭޝަނަލް އެއާޕޯޓް (ވީއައިއޭ) ގައި ހިދުމަތްދޭ ބައިނަލްއަގްވާމީ 10 އެއާލައިނެއްގެ ޗެކްއިން އިންތިޒާމުތައް އެއާޕޯޓުގެ ޓާމިނަލް 2 އަށް ބަދަލުކުރަން ނިންމައިފިއެވެ.
މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ކަނޑައަޅާފައިވާ ގޮތުގައި، އަންނަ އޮކްޓޫބަރު މަހުގެ 25 ވަނަ ދުވަހުން ފެށިގެން މުޅި ވިންޓަރ ސީޒަނުގެ ނިޔަލަށް މި ބަދަލަށް އަމަލުކުރަން ހަމަޖެހިފައިވެއެވެ. މި ބަދަލާއެކު ދަތުރުވެރިންނަށް އަވަސް އަދި ފަސޭހަ ޚިދުމަތްތަކެއް ފޯރުކޮށްދެވި، އެއާޕޯޓުގެ ދެ ޓާމިނަލްގެ ބޭނުން އެންމެ ފުރިހަމަ ގޮތުގައި ހިފޭނެއެވެ.
އާ ޓާމިނަލުން ޗެކްއިންގެ ޚިދުމަތް ދިނުމަށް ހަމަޖެހިފައިވާ އެއާލައިންތަކުގެ ތެރޭގައި އިޓަލީގެ ނިއޯސް، ރަޝިޔާގެ އޭރޯފްލޮޓާއި އަޒުރް އެއަރ، ސައިބީރިއާގެ އެސް ސެވަން އެއަރލައިންސް، ޔޫއެސް-ބަންގްލާ އެއަރލައިންސް، އުޒްބެކިސްޓާންގެ ސެންޓްރަމް އެއަރ، އަރުމީނިއާގެ ޝިރަކް އަވިއާ، ކުވައިތު އެއަރވޭސް، ބަލްގޭރިއާގެ ގުލިވް އެއަރ އަދި ފްރެންޗް ބީ ހިމެނެއެވެ.
މިއަހަރުގެ ފެބުރުއަރީ މަހު ޒަމާނީ ވަސީލަތްތަކާއެކު އަލުން ހުޅުވި ޓާމިނަލް 2 ގައި 27 ޗެކްއިން ކައުންޓަރާއި، އައު ލަގެޖް ސިސްޓަމްތަކުގެ އިތުރުން ކެއިންބުއިމުގެ ޚިދުމަތްތަކާއި، ނަމާދުކުރާ ކޮޓަރި އަދި ކުޑަކުދިން ކުޅޭނެ ހާއްސަ ސަރަޙައްދެއް ވަނީ ގާއިމުކޮށްފައެވެ.
އެމްއޭސީއެލް އިން ވަނީ އޮކްޓޫބަރު 25 އިން ފެށިގެން މި 10 އެއާލައިނުން ފުރާ މަންޒިލްތަކަށް ދަތުރުކުރާ ފަރާތްތަކުން ޗެކްއިންވުމަށް ސީދާ ޓާމިނަލް 2 އަށް ވަޑައިގަތުމަށާއި، ފުރުމުގެ ކަންކަން ފުރިހަމަކުރުމަށް އެކަށީގެންވާ ވަގުތު އޮއްވައި އެއާޕޯޓަށް ވަޑައިގަތުމަށް އިލްތިމާސްކޮށްފައެވެ.
