ޕާކިސްތާނަށް މިހާރު ކުރައްވަމުން ގެންދަވާ ރަސްމީ ދަތުރުފުޅުގައި އެ ގައުމުގެ ބޮޑުވަޒީރު ޝެހްބާޒް ޝަރީފް ބެހެއްޓެވި ގާތްކަމަށާއި އަދާކުރެއްވި ހޫނު މެހުމާންދާރީއަށް ރައީސުލްޖުމްހޫރިއްޔާ ޑޮކްޓަރ މުހައްމަދު މުއިއްޒު އިހުލާސްތެރިކަމާއެކު ޝުކުރު އަދާކުރައްވައިފިއެވެ.
ރައީސުލްޖުމްހޫރިއްޔާ ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ، ދެ ގައުމުގެ ދެމެދުގައި ބޭއްވުނު ރަސްމީ މަޝްވަރާތަކަކީ ވަރަށް ކާމިޔާބު މަޝްވަރާތަކެއް ކަމަށާއި، މިއީ ރާއްޖެއާއި ޕާކިސްތާނުގެ ހާރިޖީ ގުޅުމަށް 60 އަހަރު ފުރޭ މުނާސަބަތުގައި ދެ ގައުމުގެ ގުޅުން އިތުރަށް ބަދަހިކުރުމަށް އެޅުނު ވަރުގަދަ ބިންގަލެއް ކަމަށެވެ.
މި ބައްދަލުވުމުގައި ދެ ގައުމުގެ ޒަމާންވީ އެކުވެރިކަން މުރާޖައާކުރައްވައި، ގުޅިގެން ކުރިއަށްދާނެ މުހިންމު ދާއިރާތަކަށް ވަނީ އަލިއަޅުއްވާލައްވާފައެވެ. އޭގެ ތެރޭގައި ވިޔަފާރިއާއި އިންވެސްޓްމަންޓް، ސިއްހަތު، ތައުލީމު، ތިމާވެށި، ފަތުރުވެރިކަން، މަސްވެރިކަމާއި ދަނޑުވެރިކަން، ޒުވާނުންނާއި ކުޅިވަރު، އަދި ދިފާއީ ދާއިރާ ހިމެނެއެވެ. މީގެއިތުރުން އިންސާނީ ވަސީލަތް ތަރައްގީކުރުމާއި، ތަމްރީނު ދިނުމުގެ އިތުރުން ސަރަހައްދީ އަދި ބައިނަލްއަގުވާމީ މައިދާނުގައި އެއްބާރުލުން ދިނުމާ ގުޅޭގޮތުން ވެސް ފުޅާ ދާއިރާއެއްގައި މަޝްވަރާކުރެވުނެވެ.
މި މަޝްވަރާތަކުގެ ތެރެއިން، މިހާރު ދެ ގައުމުގެ ދެމެދުގައި އޮތް 13 މިލިއަން ޑޮލަރުގެ އަހަރީ ވިޔަފާރި، ކުރިއަށް އޮތް ދެ އަހަރު ދުވަހުގެ ތެރޭގައި 200 މިލިއަން ޑޮލަރަށް އިތުރުކުރުމަށް ވަނީ އެއްބަސްވެވިފައެވެ. އަދި ރާއްޖޭގައި ކުރިއަށްގެންދާ ފަސް މިލިއަން ގަސް އިންދުމުގެ ހާއްސަ މަޝްރޫއަށް ޕާކިސްތާނުން ވެދިން އަގުހުރި އެހީތެރިކަމަށް ރައީސުލްޖުމްހޫރިއްޔާ ވަނީ ބޮޑުވަޒީރަށް ހާއްސަ ޝުކުރެއް އަދާކުރައްވާފައެވެ. މިއީ ދެ ގައުމުގެ އިގްތިސާދީ އަދި ތިމާވެށީގެ ގުޅުން އައު އުސްމިންތަކަކަށް ގެންދިއުމަށް އެޅުނު މުހިންމު ފިޔަވަޅެކެވެ.
މި ދަތުރުފުޅުގައި އިންޓަނޭޝަނަލް އިސްލާމިކް ޔުނިވަރސިޓީ އިސްލާމްއާބާދުން ރައީސުލްޖުމްހޫރިއްޔާއަށް ސިޔާސީ އަދި ބައިނަލްއަގުވާމީ ގުޅުންތަކުގެ ދާއިރާއިން ޝަރަފުވެރި ޕީއެޗްޑީ އަރުވާފައިވާއިރު، އެމަނިކުފާނު ވަނީ އެއީ ދިވެހިރާއްޖެއަށާއި އެމަނިކުފާނަށް ލިބުނު ވަރަށް ބޮޑު ފަހުރެއް ކަމަށް ވިދާޅުވެފައެވެ. މީގެއިތުރުން ދެ ގައުމުގެ ދެމެދުގައި ސޮއިކުރެވުނު 20 ފަހުމުނާމާއަކީ ރާއްޖެއާއި ޕާކިސްތާނުގެ ގުޅުމުގައި ފެށުނު އައު، އުއްމީދީ ބާބެއް ކަމަށާއި، މި ކަންކަން ކުރިއަށް ގެންދިއުމަށް އުއްމީދުކުރައްވާ ކަމަށް ވިދާޅުވެ ރައީސްގެ ޕޯސްޓު ނިންމަވާލެއްވިއެވެ.
