ޕާކިސްތާނުގެ ބޮޑުވަޒީރު މުޙައްމަދު ޝެހްބާޒް ޝަރީފުގެ ޚާއްޞަ ދައުވަތަކަށް އެ ޤައުމަށް ކުރައްވަމުންދާ ފުރަމާނަ ދަތުރުފުޅުގެ ތެރެއިން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށް ރަސްމީކޮށް މަރުޙަބާ ދެންނެވުމުގެ ކުލަގަދަ ރަސްމިއްޔާތު މާދަމާ ބޭއްވުމަށް ހަމަޖެހިއްޖެއެވެ.
އިސްލާމްއާބާދުގައި ހުންނަ ޕާކިސްތާނުގެ ބޮޑުވަޒީރުގެ ރަސްމީ ގެކޮޅު ”ޕްރައިމް މިނިސްޓާސް ހައުސް“ގައި މާދަމާ ބާއްވާ މި ރަސްމިއްޔާތަކީ ރައީސްގެ މި ދަތުރުފުޅުގެ ތެރެއިން ބާއްވާ އެންމެ ޚާއްޞަ އެއް ހަރަކާތެވެ. މި ދަތުރުފުޅުގައި ރައީސުލްޖުމްހޫރިއްޔާގެ އަރިހުގައި އެމަނިކުފާނުގެ އަނބިކަނބަލުން ސާޖިދާ މުޙައްމަދާއި ދިވެހި ދައުލަތުގެ މަތީ ފަންތީގެ ވަފުދެއް ބައިވެރިވެވަޑައިގަންނަވައެވެ.
މިއަދުން ފެށިގެން އޮކްޓޫބަރު 22 ނިޔަލަށް ކުރިއަށްދާ މި ދަތުރުފުޅުގައި ރައީސްގެ ދެކަނބަލުން އިސްލާމްއާބާދު އިންޓަނޭޝަނަލް އެއާޕޯޓަށް ވަޑައިގަތުމުން، އެ ޤައުމުން ވަނީ ޢަސްކަރީ އެންމެ މަތީ ޝަރަފު ކަމުގައިވާ 21 ބަޑީގެ ސަލާމަކާއެކު ރަތްދޫލައިގެ މަތީ އިޙްތިރާމް އަރުވާފައެވެ. މިއީ ވޭތުވެދިޔަ 10 އަހަރަށްވުރެ ދިގު މުއްދަތަކަށްފަހު ދިވެހި ޒައީމަކު ޕާކިސްތާނަށް ކުރައްވާ ފުރަތަމަ ފުރަމާނަ ދަތުރުފުޅެވެ.
މި ތާރީޚީ ދަތުރުފުޅުގެ ސަބަބުން ދެ ޤައުމުގެ ދެމެދުގައި އޮތް ގުޅުން އިތުރަށް ބަދަހިވެ، އިޤްތިޞާދީ، ތަޢުލީމީ އަދި ދިފާޢީ ދާއިރާތަކުން ރާއްޖެއަށް ބޮޑެތި ކުރިއެރުންތަކެއް ލިބިގެންދާނެ ކަމަށް ބެލެވެއެވެ. މީގެއިތުރުން އިސްލާމީ އުއްމަތުގެ ބޮޑެތި ޤައުމުތަކާއެކު އޮންނަ އަޚުވަންތަކަމުގެ ގުޅުން އައު އުސްމިންތަކަކަށް ގޮސް، ރާއްޖޭގެ ޚާރިޖީ ސިޔާސަތު އިތުރަށް ހަރުދަނާވެގެންދާނެއެވެ.












