ހޮރްމޫޒް ކަނޑުއޮޅިން ހުއްދަނެތި ދަތުރުކުރަން އުޅުނު ދެ ތެޔޮ ބޯޓެއް، އީރާނުގެ ސިފައިން އަތުރާފައިވާ ކަނޑުގެ ބޮމެއްގައި (ނޭވަލް މައިންސް) ޖެހި އަލިފާން ރޯވެ ހުއްޓިއްޖެއެވެ.
އީރާނުގެ އައިއާރުޖީސީއިން ހާމަކުރި ގޮތުގައި، ހޮރްމޫޒް ކަނޑުއޮޅީގެ ދެކުނު ސަރަޙައްދުން ދަތުރުކުރި ދެ ތެޔޮ ބޯޓެއް ވަނީ އީރާނުގެ ނޭވީއިން އަތުރާފައިވާ ބޮމުގައި ޖެހި، ވަރުގަދައަށް އަލިފާން ރޯވެފައެވެ. މިއިން ކޮންމެ ބޯޓަކީވެސް ގާތްގަނޑަކަށް 2 މިލިއަން ފީފާގެ ކްރޫޑް އޮއިލް އުފުލަމުންދިޔަ ދެ ބޯޓެވެ. ޙަމަލާއާ ގުޅިގެން ދެ ބޯޓުވެސް ވަނީ އެއްކޮށް ހުއްޓިފައެވެ.
އީރާނުގެ ފާރްސް ނިއުސް އޭޖެންސީއިން ރިޕޯޓުކުރި ގޮތުގައި، މި ދެ ބޯޓުން ވަނީ އެ ބޯޓުތަކުގެ ލޮކޭޝަން އަންގައިދޭ ނިޒާމުތަކާއި ރާޑަރުތައް ނިއްވާލައި، އީރާނުން ހުއްދަދީފައިނުވާ މަގަކުން ދަތުރުކުރަން މަސައްކަތްކޮށްފައެވެ. އައިއާރުޖީސީއިން ވަނީ، ޤަވާޢިދާ ޚިލާފަށް ނިޒާމުތައް ނިއްވާލައިގެން ދަތުރުކުރާ ބޯޓުފަހަރަށް ވަރުގަދަ ރައްދެއް ދޭނެކަމަށް ބުނެ އިންޒާރުދީފައެވެ. އަދި އެމެރިކާގެ ޢަމަލުތައް ހުރިގޮތުން ތެޔޮ ކުންފުނިތަކުން ދައްކަންޖެހޭ އަގު ބޮޑުވާނެކަމަށްވެސް ބުނެފައިވެއެވެ.
މި ޙާދިސާގެ އިތުރުން، އައިއާރުޖީސީން ވަނީ ހުރްމުޒް ކަނޑުއޮޅީގެ މަތިން ދަތުރުކުރި އެމެރިކާގެ އެމްކިއު-9 ރީޕަރ މަރުކާގެ ޖާސޫސީ ޑްރޯނެއް ހޯމަ ދުވަހުގެ ރޭ ވައްޓާލާފައިވާކަމަށް ބުނެފައެވެ.
