ގދ. ތިނަދޫ ސިޓީގައި ބަނގުރާ ކައްކައި، އުފައްދައި އަދި އޭގެ ވިޔަފާރިކުރާ ކަމުގެ ތުހުމަތުގައި ހިންގި ޚާއްޞަ އޮޕަރޭޝަނެއްގައި މީހަކު ހައްޔަރުކޮށްފިއެވެ.
މި މައްސަލައާ ގުޅިގެން ފުލުހުންގެ ބެލުމުގެ ދަށަށް ގެނެސްފައިވަނީ އެ ރަށުގައި މި ވިޔަފާރި ހިންގާ ނެޓްވޯކްގައި އިސްކޮށް ހަރަކާތްތެރިވާ ކަމަށް ތުހުމަތުކުރެވޭ މީހެކެވެ. އެއީ ގދ. ތިނަދޫ، ރިހިކޮކާގެ، ޢުމުރުން 21 އަހަރުގެ މުޙައްމަދު އަފާޒު ބިން ޢަބްދުﷲ އެވެ. އޭނާ ހައްޔަރުކޮށްފައިވަނީ ކޯޓު އަމުރެއްގެ ދަށުން، މި އޮކްޓޫބަރު މަހުގެ 18 ވަނަ ދުވަހުއެވެ.
މި އޮޕަރޭޝަނަކީ ތިނަދޫ ޕޮލިހާއި ކައުންޓަރ ނާކޮޓިކްސް އިންޓެލިޖެންސް ގުޅިގެން ރަށުތެރޭގައި ހިންގަމުންދިޔަ މަސްތުވާތަކެއްޗާއި ބަނގުރަލުގެ ވަގު ވިޔަފާރި ހުއްޓުވުމަށް ހިންގި އޮޕަރޭޝަނެކެވެ. މި އޮޕަރޭޝަންގެ ތެރެއިން، ތުހުމަތުކުރެވޭ މުޙައްމަދު އަފާޒާ ގުޅުންހުރި ކަމަށް ބެލެވޭ ތިނަދޫގެ ފްލެޓެއް ވަނީ ކޯޓު އަމުރެއްގެ ދަށުން ބަލައިފާސްކޮށްފައެވެ.
އެ ފްލެޓް ބަލައިފާސްކުރިއިރު، ބަނގުރާ އުފެއްދުމަށް ބޭނުންކުރާ ގިނަ ޢަދަދެއްގެ ސާމާނާއި، ބަނގުރާ ކަމަށް ބެލެވޭ އެއްޗެއް އަޅާފައިހުރި 20 ލީޓަރުގެ ތިން ހަމުގެ އިތުރުން، ބަނގުރާ ކަމަށް ޝައްކުކުރެވޭ އެއްޗެއް ހުރި 500 އެމްއެލްގެ ފުޅިއެއް ފެނިފައިވާ ކަމަށް ފުލުހުން މަޢުލޫމާތު ދެއެވެ.
މި މައްސަލައާ ގުޅިގެން އޭނާގެ ބަންދާމެދު ގޮތެއް ނިންމުމަށްޓަކައި ކޯޓަށް ހާޒިރުކުރުމުން، ކޯޓުން ވަނީ އޭނާގެ ބަންދަށް 15 ދުވަހުގެ މުއްދަތެއް ދީފައެވެ.
މި މައްސަލަ ތިނަދޫ ޕޮލިސް ސްޓޭޝަނުން މިހާރު ދަނީ އިތުރަށް ތަޙުޤީޤު ކުރަމުންނެވެ.
