އިންޑިއާގެ އައްސާމް ސްޓޭޓްގައި ބީޖޭޕީ ސަރުކާރުން މުސްލިމު އާބާދީތަކަށް އަމާޒުކޮށް ހިންގަމުންދާ ހަރުކަށި ސިޔާސަތުތަކުގެ ދަށުން ހިންގި އޮޕަރޭޝަނެއްގައި، ނަގައޮން، ހޮޖާއީ، އަދި ގޮލާޣަޓް ޑިސްޓްރިކްޓްގައި ދިރިއުޅޭ 1،100 އަށްވުރެ ގިނަ މުސްލިމް ޢާއިލާތަކުގެ ގެދޮރު ތަޅާލައި، އެމީހުން މަގުމަތިކޮށްލައިފިއެވެ.
އޮކްޓޯބަރ 17 އަދި 18 ވަނަ ދުވަހު ހިންގި މި އޮޕަރޭޝަނުގައި، ލުޓުމާރީ ލޯންގްޖަޕް ރިޒަރވް ފޮރެސްޓް ސަރަޙައްދުގައި ހުރި 50 އަހަރަށްވުރެ ގިނަ ދުވަސްވީ 10 އަކަށްވުރެ ގިނަ މިސްކިތްވެސް ވަނީ ބުލްޑޯޒަރު ބޭނުންކޮށްގެން ބިމާ ހަމަކޮށްލާފައެވެ.
More than 1,100 families, most of them Bengali-speaking Muslims, have been evicted from forest land in Assam's Nagaon, Hojai and Golaghat districts in a two-day demolition drive, according to officials and media reports.
On Sunday, October 18, homes of more than 600 families… pic.twitter.com/3MwZ0Joi2P
— The Siasat Daily (@TheSiasatDaily) October 19, 2026
އައްސާމް ސަރުކާރުން ބުނާގޮތުގައި މިއީ ޙިމާޔަތްކޮށްފައިވާ ޖަންގަލީގެ ބިންތަކެއް ޤަވާއިދާ ޚިލާފަށް ހިފައިގެން އުޅޭތީ އެ ބިންތައް އަތުލުމަށް ހިންގި ޤާނޫނީ އޮޕަރޭޝަނެކެވެ. ނަމަވެސް، އެ ސަރަޙައްދުގައި ދިރިއުޅޭ މީހުން ބުނާގޮތުގައި އެމީހުންނަކީ ޤަވާއިދާ ޚިލާފަށް ބިން ހިފައިގެން އުޅޭ ބައެއް ނޫނެވެ. އެމީހުން ބުނަނީ 1974 ވަނަ އަހަރު، ޖަންގަލީގެ މަސައްކަތްކުރާ މީހުންގެ ގޮތުގައި (’ތައުންގްޔާ‘ ނިޒާމުގެ ދަށުން) އެމީހުންގެ ކާބަފައިން އެތަނުގައި ވަޒަންވެރިކުރުވީ ސީދާ ސަރުކާރުންނެވެ.
މި މައްސަލައިގައި ޢާންމުންގެ ފަރާތުން ގުވާހާޓީ ހައިކޯޓަށް މައްސަލަ ހުށަހެޅި ނަމަވެސް، ކޯޓުން ނިންމާފައިވަނީ ސަރުކާރާ އެއްކޮޅަށެވެ. އަދި އެ މީހުންނަކީ އެތަނުގައި ޤަވާއިދާ ޚިލާފަށް އުޅޭ ބައެއްކަމަށް ކަނޑައަޅައި، އެ ބިންތައް ހުސްކުރުމަށް ކޯޓުން ވަނީ އަމުރުކޮށްފައެވެ.
އިންސާނީ ޙައްޤުތަކަށް މަސައްކަތްކުރާ ފަރާތްތަކުން ފާހަގަކުރާ ގޮތުގައި، އައްސާމްގައި ހިންގާ މިފަދަ ބިން ހުސްކުރުމުގެ އޮޕަރޭޝަންތަކަކީ މުސްލިމުންނަށް (ޚާއްޞަކޮށް ބެންގާލީ މުސްލިމުންނަށް) އަމާޒުކޮށްގެން ސަރުކާރުން ހިންގަމުންދާ ނިޒާމީ ހަރަކާތްތަކެކެވެ. އެކަށީގެންވާ ބަދަލެއް ނުވަތަ ބޯހިޔާވަހިކަމެއް ނުދީ، މިފަދަ ގޮތަކަށް އެތައް ހާސް ބަޔަކު މަގުމަތިކުރުމަކީ ބޮޑުވެގެންވާ އިންސާނިއްޔަތާ ޚިލާފު އަމަލެއްކަމަށް އެ ފަރާތްތަކުން ބުނެއެވެ.
