ރާއްޖޭގައި ކާބަން ވިއްކުމުގެ ވިޔަފާރި ނުވަތަ ކާބަން ކްރެޑިޓް ޓްރޭޑިން ފެށުމަށްޓަކައި އެކުލަވާލަންޖެހޭ ގަވާއިދުގެ ފުރަތަމަ ދެލިކޮޕީ އެކުލަވާލައި ނިމިފައިވާ ކަމަށާއި، މި އަހަރު ނިމުމުގެ ކުރިން އެ ގަވާއިދު ގެޒެޓްކުރުމަށް މަސައްކަތް ކުރަމުންދާ ކަމަށް މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވަޒީރު ޢަލީ ޝަރީފް ވިދާޅުވެއްޖެއެވެ.
ވަޒީރު މިކަން ހާމަކުރެއްވީ ދައުލަތުގެ މީޑިއާ، ޕީއެސްއެމް ނިއުސްގެ ”ރާއްޖެމިއަދު“ ޕްރޮގްރާމުގައި ވާހަކަފުޅު ދައްކަވަމުންނެވެ.
ކާބަން ކްރެޑިޓް ޓްރޭޑިންއަކީ ދުނިޔެ ހޫނުވުން ކުޑަކުރުމުގެ ގޮތުން ޖައްވަށް ދޫކުރާ ވިހަ ގޭސްތައް މަދުކުރުމަށް ބާރުއެޅުމަށް ބައިނަލްއަޤްވާމީ ފެންވަރުގައި ހިންގާ ވިޔަފާރިއެކެވެ. މި ނިޒާމުގެ ދަށުން ގަސް އިންދުމާއި، އިރުގެ ހަކަތަ ފަދަ އިއާދަކުރަނިވި ހަކަތައިގެ މަޝްރޫޢުތައް ހިންގައިގެން ޖައްވުން ކާބަން މަދުކުރާ ކުންފުނިތަކަށާއި ގައުމުތަކަށް ލިބޭ ކާބަން ކްރެޑިޓް ބައިނަލްއަޤްވާމީ ބާޒާރުގައި ވިއްކުމުގެ ފުރުސަތު ލިބެއެވެ.
ވަޒީރު ވިދާޅުވީ، ކާބަން މާކެޓް ފުޅާކުރުމަށްޓަކައި ގާނޫނީ އަދި ގަވާއިދުގެ އޮނިގަނޑު ފުރިހަމަކުރުމަކީ ކޮންމެހެން ކުރަންޖެހޭ ކަމެއް ކަމަށާއި، މިހާރު ކުރިއަށްދަނީ އެކުލަވާލެވުނު ފުރަތަމަ ޑްރާފްޓް މުރާޖަޢާކުރުމުގެ މަސައްކަތް ކަމަށެވެ. އަދި މި އަހަރު ނިމުމުގެ ކުރިން ގެޒެޓްކުރުމަށް އަމާޒު ހިފާފައިވާ މި ގަވާއިދުގައި، ކަމާބެހޭ އިދާރީ ޒިންމާތަކާއި، ކްރެޑިޓް ބަލަހައްޓާނެ މެތޮޑޮލޮޖީގެ އިތުރުން ރެކޯޑްތަކާއި ރިޕޯޓްތައް ބަލަހައްޓާނެ އުސޫލުތައް ބަޔާންކުރެވިގެންދާނެ ކަމަށް ވަޒީރު ފާހަގަކުރެއްވިއެވެ.
މީގެއިތުރުން، މާކެޓުގައި ކާބަން ވިއްކުމަށްޓަކައި އެކަށީގެންވާ ފެންވަރަކަށް ކޮލިޓީ ރަނގަޅުކުރަންޖެހޭކަން ފާހަގަކުރައްވަމުން ވަޒީރު ވިދާޅުވީ، ކާބަން މަޝްރޫޢުތަކަކީ ބޮޑު ޚަރަދެއް ހިނގާ މަޝްރޫޢުތަކެއް ކަމުން އެފަދަ ކަންކަމުން ފައިދާ ހޯދުމުގައި ގޮންޖެހުންތަކެއް ހުރި ކަމަށެވެ. އެހެންކަމުން މި މެކޭނިޒަމްގެ ތެރެއިން ފުރިހަމަކުރަންޖެހޭ ގިނަ ކަންތައްތަކެއް އެބަހުރި ކަމަށް ވިދާޅުވިއެވެ.
ތިމާވެއްޓާ ބެހޭ ވުޒާރާއިން ހާމަކުރާ ގޮތުގައި، ކުރިއަށް އޮތް ތަނުގައި ބޮޑެތި މަޝްރޫޢުތައް މެދުވެރިކޮށް ކާބަން މާކެޓް ފުޅާވެގެން ދިއުމަކީ ރާއްޖޭގެ އަމިއްލަ ވިޔަފާރިތަކަށް މި ދާއިރާއިން އިންވެސްޓްކުރުމަށް ގިނަ ފުރުސަތުތަކެއް ހުޅުވިގެންދާނެ ކަމެކެވެ.
