ދިވެހި ރައްޔިތުންނަށް ނުލިބޭ ފަދަ މާބޮޑެތި އިނާޔަތްތަކާއި މަންފާތަކެއް ރައްޔިތުންގެ މަޖިލީހުގެ މެންބަރުންނަށް ލިބިވަޑައިގަންނަވަން ބޭނުންފުޅު ނުވާ ކަމަށާއި، އިންޝުއަރެންސް ޕްރީމިއަމް އަމިއްލަ މުސާރައިން އުނިކުރަން ތައްޔާރަށް ހުންނެވި ކަމަށް މެންބަރު ޙުސައިން ޙަމީދު ވިދާޅުވެއްޖެއެވެ.
މެންބަރު ޙުސައިން ޙަމީދު މިހެން ވިދާޅުވީ، ރައްޔިތުންގެ މަޖިލީހުގެ މެންބަރުންނަށް ލިބިވަޑައިގަންނަވާ ޚާއްޞަ ހެލްތު އިންޝުއަރެންސާ ގުޅިގެން ޢާންމުންގެ ބޮޑެތި ކަންބޮޑުވުންތަކެއް ހުރުމުން، އެ އިނާޔަތް ކަނޑާލުމަށް އެދި މަޖިލީހަށް ހުށަހެޅި ޕެޓިޝަނަކާ ގުޅިގެން މިއަދު މަޖިލީހުގެ ތަޅުމުގައި ކުރިއަށްދިޔަ ބަހުސްގައި ވާހަކަދައްކަވަމުންނެވެ.
މަޖިލީހުގައި ވާހަކަދައްކަވަމުން އޭނާ ވިދާޅުވީ، މިހާރު މެންބަރުންނަށް ލިބިވަޑައިގަންނަވާ އިންޝުއަރެންސަކީ މި ދައުރުގެ މަޖިލީހުން އެދިގެން ނުވަތަ އަލަށް ފާސްކޮށްގެން ދޭ އެއްޗެއް ނޫން ކަމަށާއި، އެއީ މާ ކުރިން ޤާނޫނަކުން ލާޒިމްކޮށްފައިވާ ކަމެއް ކަމަށެވެ. އަދި ރައްޔިތުންނަށް ނުލިބޭ އިނާޔަތްތަކެއް މެންބަރުންނަށް ލިބުމަކީ އެދޭ ކަމެއް ނޫން ކަމަށްވެސް ވިދާޅުވިއެވެ.
އާސަންދައަށް ކުރާ ބުރަ ކުޑަކުރުމަށް ޚިޔާލު ހުށަހަޅުއްވަމުން މެންބަރު ވިދާޅުވީ، މަހަކު 30،000، 40،000 ނުވަތަ 50،000 ރުފިޔާއަށްވުރެ މަތިން މުސާރަ ލިބޭ ކޮންމެ ދިވެހި ރައްޔިތަކުވެސް އިންޝުއަރެންސް ޕެކޭޖަކަށް އަމިއްލައަށް ޕްރީމިއަމް ދައްކައިގެން ޚިދުމަތް ހޯދާނެ ނިޒާމެއް ޤާއިމުކުރަންޖެހޭ ކަމަށެވެ.
”ހަޤީޤަތުގައި އަޅުގަނޑުމެން ރައްޔިތުންނަށްޓަކައި އަޅުގަނޑުވެސް މިހުރީ ތައްޔާރު، އަޅުގަނޑުމެންގެ މުސާރައިން އެ ދެހާސް ރުފިޔާ އުނިކޮށްފައި އިންޝުއަރެންސް ސްކީމުގައި ބައިވެރިވާން. އެހެންވީމަ މީއަކީ އެއްގޮތަކަށްވެސް އަޅުގަނޑުމެން ކަންބޮޑުވާ ކަމެއް ނޫން،“ ޙުސައިން ޙަމީދު ވިދާޅުވިއެވެ.
ދައުލަތުގެ ބަޖެޓުން އާސަންދައަށް ކުރާ ބޮޑު ހޭދަ ކުޑަކުރުމަށްޓަކައި ސަރުކާރުންވެސް ބަދަލުތަކެއް ގެންނަން މަސައްކަތް ކުރަމުންދާ ދަނޑިވަޅެއްގައި، ބޮޑު މުސާރަ ލިބޭ ފަރާތްތަކުން އަމިއްލައަށް އިންޝުއަރެންސް ޕްރީމިއަމް ދައްކަންޖެހޭ ގޮތަށް ނިޒާމު ބަދަލުކުރުމަކީ މިވަގުތަށް ކޮންމެހެން ބޭނުންތެރި ކަމެއްގެ ގޮތުގައި މެންބަރު ވަނީ ފާހަގަކުރައްވާފައެވެ.
