ތައިލެންޑުން ރާއްޖެއައި ނޭޕާލްގެ ދެ ފަސިންޖަރަކު ދިރުވާލައިގެން އެތެރެކުރަން އުޅުނު ކިލޯއަކަށްވުރެ ގިނަ މަސްތުވާތަކެތި މޯލްޑިވްސް ކަސްޓަމްސް ސާވިސްއިން ވެލާނާ އިންޓަރނޭޝަނަލް އެއާޕޯޓުން އަތުލައިގަނެ، އެ ދެ މީހުން ހައްޔަރުކޮށްފިއެވެ.
ކަސްޓަމްސްއިން މަޢުލޫމާތު ދީފައިވާ ގޮތުގައި، މި ދެ މީހުން އަތުލައިގަނެފައިވަނީ މިދިޔަ ސެޕްޓެންބަރު މަހުގެ 25 ވަނަ ދުވަހުއެވެ. އެއާޕޯޓުން ދަތުރުވެރިން ފަސްކުރަމުންދިޔައިރު، އެ ދެ ފަސިންޖަރުންގެ އުޅުމާއި ޢަމަލުތައް ހުރިގޮތުން ޝައްކުކުރެވިގެން ސުވާލުކޮށް، އިތުރަށް ބަލައިފާސްކުރުމުގެ ތެރޭގައި އެ މީހުން ދިރުވާލައިގެން ތަކެތި ގެންގުޅޭކަން ވަނީ ފާހަގަކުރެވިފައެވެ.
މި އޮޕަރޭޝަނުގައި އަތުލައިގަތް މަސްތުވާތަކެތީގެ ޖުމްލަ ބަރުދަނުގައި 1183.8 ގްރާމް ހުރިއިރު، އޭގެ ތެރޭގައި ތިން ބާވަތެއްގެ މަސްތުވާތަކެތި ހިމެނެއެވެ. އެއީ 708.2 ގްރާމްގެ ހެރޮއިންއާއި، 424 ގްރާމްގެ ކޮކެއިންގެ އިތުރުން 51.6 ގްރާމްގެ މޯފިންއެވެ.
ޤާނޫނުބުނާ ގޮތުން ދިރުވާލައިގެން ނުވަތަ ހަށިގަނޑު ތެރޭގައި ރައްކާކޮށްގެން މަސްތުވާތަކެތި އެތެރެކުރުމަކީ ބޮޑު ކުށެކެވެ. އެހެންކަމުން މި މައްސަލައިގައި ހައްޔަރުކުރެވުނު ބިދޭސީ ދެ މީހުންގެ މައްޗަށް ކުށް ސާބިތުވެއްޖެނަމަ، ބޮޑު ޖޫރިމަނާއަކާއެކު ޢުމުރު ދުވަހުގެ ޖަލު ހުކުމެއް އެ މީހުންނަށް އަންނާނެއެވެ.
