ކ. ތިލަފުށީގައި ޤާއިމްކުރަމުންދާ އިންސިނަރޭޓަރުގެ މަސައްކަތް 2028 ވަނަ އަހަރުގެ މެދުތެރެއަށް ނިންމައި، ބޭނުންކުރަން ފެށޭނެ ކަމަށް މޫސުމީ ބަދަލުތަކާއި ތިމާވެށްޓާއި ހަކަތައާ ބެހޭ ވަޒީރު އަލީ ޝަރީފް ވިދާޅުވެއްޖެއެވެ.
ވަޒީރު މިކަން ހާމަކުރެއްވީ ރައީސުލްޖުމްހޫރިއްޔާގެ އޮފީހާއި, ޕީއެސްއެމް ގުޅިގެން ސަރުކާރުގެ މަސައްކަތްތަކާ ގުޅޭގޮތުން އާންމުންނަށް މައުލޫމާތު ދިނުމަށް ބޭއްވި ”އަހާ“ ފޯރަމްގައި ވާހަކަދައްކަވަމުންނެވެ.
ވަޒީރު އަލީ ޝަރީފް ވިދާޅުވީ، ރާއްޖޭގައި އެންމެ ފުޅާ ދާއިރާއެއްގައި ފައިބަރުގެ މަސައްކަތް ކުރަމުންދަނީ ތިލަފުށީގައި ކަމަށެވެ. އަދި ފައިބަރަކީ ވަކި އުސޫލުތަކެއްގެ ދަށުން ރައްކާތެރިކަމާއެކު ނައްތާލަންޖެހޭ އެއްޗަކަށް ވާތީ، ރާއްޖޭގެ އެކި ރަށްރަށުން ވެސް ފައިބަރުގެ ބާވަތްތައް ތިލަފުއްޓަށް ގެންނަމުންދާ ކަމަށާއި، މިތަކެތި ރަނގަޅު ނިޒާމެއްގެ ދަށުން މެނޭޖްކުރުމުގެ މަސައްކަތްތައް ކުރެވެމުންދާ ކަމަށް އެމަނިކުފާނު ވިދާޅުވިއެވެ.
އިންސިނަރޭޓަރުގެ މަޝްރޫޢުގެ މިހާރުގެ ހާލަތާ ގުޅޭގޮތުން ވާހަކަދައްކަވަމުން ވަޒީރު ވިދާޅުވީ، ދުވަސްތަކެއް ވަންދެން މަސައްކަތް ހުއްޓިފައި އޮތުމަށްފަހު، މިހާރު ވަރަށް އަވަހަށް މަސައްކަތް އަލުން ފެށުމަށް ތައްޔާރުވަމުންދާ ކަމަށެވެ.
”ދުވަސްތަކެއް ވަންދެން ހުއްޓިފައި ހުރުމަށްފަހު، މިހާރު އަނެއްކާ މަސައްކަތް ވަރަށް އަވަހަށް ފެށިގެންދާނެ. އެއާއެކު ގިނަ ވަމުންދާ ފައިބަރައަށް ބޮޑު ހައްލެއް ލިބިގެންދާނެ. ޕްލޭންއަކީ 2028 ވަނަ އަހަރުގެ މެދުތެރޭގައި ބޭނުންކުރަން ފެށުން. މިހާރު ނިމިފައިވަނީ 40 އިންސައްތަ. ކޮންޓްރެކްޓަރުގެ މައްސަލައާއި މަސައްކަތް ހުއްޓިފައި ހުރުމަށް ފަހު، މިހާރު އައު ކޮންޓްރެކްޓަރާއެކު މަސައްކަތް ދަނީ ކުރަމުން،“ ވަޒީރު ވިދާޅުވިއެވެ.
މީގެއިތުރުން ތިލަފުށީގައި ޤާއިމުކުރާ ވޭސްޓް-ޓު-އެނާޖީ (ކުނިން ހަކަތަ އުފައްދާ) ޕްލާންޓުގެ މަސައްކަތްވެސް 2028 ވަނަ އަހަރުގެ ނިޔަލަށް އެއްކޮށް ނިންމައި، ބޭނުންކުރަން ފެށުމަށް ދަނީ ތައްޔާރުވަމުންނެވެ. މި ޕްލާންޓަކީ ދުވާލެއްގެ މައްޗަށް 500 ޓަނުގެ ކުނި އެންދުމުގެ ޤާބިލުކަން ލިބިފައިވާ، އަދި 13 މެގަވޮޓުގެ ކަރަންޓު އުފެއްދުމުގެ ޤާބިލުކަން ލިބިގެންވާ ޕްލާންޓެކެވެ.
ތިމާވެށްޓާ ބެހޭ ވުޒާރާއިން ވިދާޅުވި ގޮތުގައި، މި ޕްލާންޓް ބޭނުންކުރަން ފަށާތާ ދެ އަހަރު ދުވަހުގެ ތެރޭގައި، ރާއްޖެއިން ޖައްވަށް ބޭރުކުރާ ކާބަންޑައިއޮކްސައިޑުގެ ތެރެއިން އަހަރަކު 40،000 މެޓްރިކް ޓަނުގެ ކާބަންޑައިއޮކްސައިޑް ބޭރުކުރުން ހުއްޓުވޭނެއެވެ.
މީގެއިތުރުން، މި ޕްލާންޓުން އުފައްދާ ކަރަންޓުގެ ތެރެއިން މައި ގްރިޑަށް ފޯރުކޮށްދޭ 10 މެގަވޮޓުގެ ހަކަތައާއެކު، ކަރަންޓު އުފެއްދުމަށް ތެލަށް ކުރާ ހޭދައިން ގާތްގަނޑަކަށް ދެ މިލިއަން ޑޮލަރު ސަލާމަތް ކުރެވިގެންދާނެ ކަމަށްވެސް އެ ވުޒާރާއިން ހާމަކުރެއެވެ. މި މަޝްރޫޢަކީ ތިލަފުށީގެ ކުނީގެ މައްސަލައަށް ދާއިމީ ހައްލެއް ހޯދުމަށާއި، ރާއްޖޭގެ ތިމާވެށި ރައްކާތެރިކުރުމަށް ސަރުކާރުން ކުރިއަށްގެންދާ މުހިންމު މަސައްކަތެކެވެ.
