ދިރިއުޅުމުގެ ޚަރަދުތައް އިންތިހާއަށް ބޮޑުވުމާ ގުޅިގެން އީޔޫގެ 4 ޤައުމެއްގައި އެތައް ލައްކަ ބަޔަކު މަގުތަކަށް ނުކުމެ ބޮޑެތި މުޒާހަރާތަކެއް ފަށައިފިއެވެ.
އިޓަލީގެ މިލާން އަދި ބޮލޯނިއާގައި ކުރިއަށްދިޔަ މުޒާހަރާތައް ވަނީ ވަރަށް ބޮޑަށް ހޫނުވެފައެވެ. މުޒާހަރާގެ ބައިވެރިން ފުލުހުންނަށް ގާއުކުމާ ގުޅިގެން، ފުލުހުން ވަނީ ކަރުނަގޭހާއި ވޯޓަރ ކެނަން ބޭނުންކޮށްފައެވެ. އިޓަލީގެ ބޮޑުވަޒީރު ޖޯޖިއާ މެލޯނީ ވަނީ މުޒާހަރާ ކުރުމަކީ ޙައްޤެއް ކަމަށާއި، ނަމަވެސް ސިޓީތައް ހަނގުރާމައިގެ މައިދާނަކަށް ހެދުމަކީ ޙައްޤެއް ނޫންކަމަށް ބުނެފައެވެ.
ފްރާންސްގައި 500،000 އަށްވުރެ ގިނަ މީހުން މުޒާހަރާކުރަމުންދާއިރު، ބެލްޖިއަމް އަދި ޕޯޗުގަލްގައިވެސް އާންމުން ދަނީ ތަކެތީގެ އަގުބޮޑުވުމާއި މުސާރަ ކުޑަވުމާ ދެކޮޅަށް އަޑުއުފުލަމުންނެވެ.
އީޔޫގެ ސިޔާސަތުތަކާބެހޭ ތަޖުރިބާކާރުން އަލްޖަޒީރާއަށް މަޢުލޫމާތު ދިން ގޮތުގައި، މި މުޒާހަރާތައް ވަރަށް އަވަހަށް ޖަރުމަނުވިލާތް، ގްރީސް އަދި އޮސްޓްރިއާއަށް ފެތުރިގެން ދިއުމަކީ ވަރަށް ގާތްކަމެކެވެ. މިއީ ވިލާތުގެ ޤައުމުތަކުގެ ސަރުކާރުތަކަށް ކުރިމަތިވެފައިވާ ވަރަށް ބޮޑު ގޮންޖެހުމެކެވެ.
