އަމިއްލަ ބިމުގައި ގެދޮރު ބިނާކުރުމަށް ބޭންކުތަކުން ނަގާ ލޯނުތަކަށް ބޭނުންވާ އިކުއިޓީ ފައިސާ، އަނބުރާ ދައްކަން ނުޖެހޭ ހިލޭ އެހީއެއްގެ ގޮތުގައި ސަރުކާރުން ހަމަޖައްސައިދިނުމުގެ މަޝްރޫޢުގެ ދަށުން މާލީ ހަތަރު އިދާރާއަކާއެކު މިއަދު ފަހުމުނާމާ (އެމްއޯޔޫ) އެއްގައި ސޮއިކޮށްފިއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ކުރިއަށްގެންދާ ”ބޯހިޔާވަހިކަން އެންމެންނަށް“ ސިޔާސަތުގެ ދަށުން ވެވުނު މި އެއްބަސްވުމުގައި ސޮއިކޮށްފައިވަނީ ބޭންކް އޮފް މޯލްޑިވްސް (ބީއެމްއެލް)، މޯލްޑިވްސް އިސްލާމިކް ބޭންކް (އެމްއައިބީ)، ހައުސިންގ ޑިވަލަޕްމަންޓް ފައިނޭންސިންގ ކޯޕަރޭޝަން (އެޗްޑީއެފްސީ) އަދި މޯލްޑިވްސް ފައިނޭންސް ލީސިންގ ކޮމްޕެނީ (އެމްއެފްއެލްސީ) އެވެ.
މި ޕްރޮގްރާމަކީ އެކި ފަންތީގެ ރައްޔިތުންނަށް ދިމާވެފައިވާ ބޯހިޔާވަހިކަމުގެ ތަކުލީފުތަކަށް ޖުމްލަ ހައްލެއް ގެނެސްދިނުމަށް އެކުލަވާލާފައިވާ ފުޅާ ސިޔާސަތެކެވެ. މީގެ ތެރޭގައި ސަރުކާރުން ސީދާ އަޅާ ފްލެޓްތަކާއި، އަމިއްލަ ފަރާތްތަކާ ގުޅިގެން ހަދާ އަގުހެޔޮ ހައުސިންގ ޔުނިޓްތަކުގެ އިތުރުން، އަމިއްލަ ގޯތީގައި ގެދޮރު އިމާރާތްކުރުމަށް މާލީ އެހީތެރިކަން ދިނުން ހިމެނެއެވެ.
ވޯލްޑް ބޭންކާއި ކަމާބެހޭ ވުޒާރާ ގުޅިގެން ހެދި ދިރާސާތަކުން ހާމަވެފައިވާ ގޮތުގައި، ދިވެހިންނަށް އަމިއްލަ ގޯތީގައި ގެދޮރު އެޅުމުގައި ދިމާވާ އެންމެ ބޮޑު ހުރަހަކީ ބޭންކުތަކުން ޑައުންޕޭމަންޓް ނުވަތަ އިކުއިޓީގެ ގޮތުގައި ދައްކަން ޝަރުތުކުރާ ފައިސާ ނެތުމެވެ. އެހެންކަމުން އަލަށް ތަޢާރަފުކުރި މި އުސޫލުގެ ދަށުން، އަލަށް ގެދޮރު ބިނާކުރާ ފަރާތްތަކަށް ބޭންކުން ލޯނު ހަމަޖެހުމާއެކު ބޭނުންވާ އިކުއިޓީ ސަރުކާރުން ހިލޭ ދައްކައިދޭނެއެވެ. ނަމަވެސް، އެގޮތަށް އިމާރާތްކުރާ ގެދޮރު ވަކި މުއްދަތެއްގެ ތެރޭގައި ވިއްކާލައިފިނަމަ، ސަރުކާރުން ދިން ފައިސާ އަނބުރާ ހޯދާނެއެވެ.
މި އުސޫލު ހިނގާނެ ގޮތުގެ މިސާލަކަށް ބަލާއިރު، އެއް މިލިއަން ރުފިޔާގެ ޚަރަދަކުން އަޅާ ތިން ކޮޓަރީގެ ގެއަކަށް ބޭނުންވާ އިކުއިޓީގެ ގޮތުގައި ގާތްގަނޑަކަށް ދެ ލައްކަ ރުފިޔާ ސަރުކާރުން ހިލޭ ދޭނެއެވެ. އަދި ބާކީ އަށް ލައްކަ ރުފިޔާ ހަމަޖައްސާނީ ބޭންކު ލޯނުގެ ތެރެއިންނެވެ.
މިދިޔަ އަހަރު ހިންގި 5 އިންސައްތައިގެ ލޯނު ސްކީމުގައި ބައިވެރިވީ ހަމައެކަނި ބީއެމްއެލްއިން ކަމަށްވާއިރު، އެ ބޭންކުން ވަނީ 800 އަށް ވުރެ ގިނަ ފަރާތަކަށް 1 ބިލިއަނަށް ވުރެ ގިނަ ރުފިޔާ ދޫކޮށްފައެވެ. އެހެން ނަމަވެސް، މިފަހަރު ގެނެވުނު ހަރުދަނާ ބަދަލުތަކާއެކު އިތުރު ފައިނޭންސިންގ އިދާރާތަކަށް މި ޕްރޮގްރާމުގައި ބައިވެރިވުމުގެ މަގު ވަނީ ތަނަވަސްވެގެން ގޮސްފައެވެ.
މި ސްކީމުގެ ފުރަތަމަ މަރުހަލާ އަމާޒުކޮށްފައިވަނީ މާލޭގައި އަމިއްލަ ގޯތި އޮވެ، އިކުއިޓީ ފައިސާ ނުދެއްކިގެން ގެދޮރު ނޭޅިފައި ތިބި އާއިލާތަކަށެވެ. އަދި ކުރިއަށް އޮތް ފިޔަވަހިތަކުގައި ހުޅުމާލެ، ގުޅިފަޅު އަދި ގިރާވަރުފަޅުން ދޫކޮށްފައިވާ ބިންތަކަށް ވެސް މި ފުރުސަތު ފުޅާކުރެވިގެންދާނެ ކަމަށް މަޢުލޫމާތު ލިބެއެވެ.
ކޮބާ އަތޮޅުތަޢް ! އަތޮޅުތަކުގައި ތިބީ ދިވެހި ރަޢްޔިތުން ނޫންތޯ !!!!!!