ފަލަސްތީނުގެ މިނިވަންކަމާއި އިސްލާމީ އުއްމަތުގެ ޙައްޤުގައި ދިވެހިރާއްޖެއިން ކުރަމުންދާ ވަކާލާތު އެއްވެސް ގޮތަކަށް ހުއްޓާނުލައި ސާބިތުކަމާއެކު ދެމިއޮންނާނެކަމުގެ ފުރިހަމަ ޔަޤީންކަން ޚާރިޖީ ވަޒީރު އިރުތިޝާމް އާދަމް ދެއްވައިފިއެވެ.
އިރާގުގެ ބަގްދާދުގައި ކުރިއަށްދިޔަ އޯގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ)ގެ ހާރިޖީ ވަޒީރުންގެ ކައުންސިލްގެ 52 ވަނަ ބައްދަލުވުމުގައި ތަގުރީރު ކުރައްވަމުން ވަޒީރު އިރުތިޝާމް ވަނީ، އިސްލާމީ އުއްމަތަށް މިހާރު ކުރިމަތިވެފައިވާ އެކި ގޮންޖެހުންތަކާއި މައްސަލަތަކާމެދު ކަންބޮޑުވުން ފާޅުކުރައްވާފައެވެ. އަދި ސުލްހަ ގާއިމުކުރުމަށާއި މައްސަލަތަކަށް ހައްލު ހޯދުމަށްޓަކައި މެންބަރު ގައުމުތަކުގެ މެދުގައި މަޝްވަރާތައް ފުޅާކޮށް، ގުޅުން އިތުރަށް ބަދަހިކުރުމުގެ މުހިންމުކަމަށް އެކަމަނާ އަލިއަޅުވާލެއްވިއެވެ.
ފަލަސްތީނުގެ މައްސަލައިގައި ރާއްޖެއިން ގެންގުޅޭ ސިޔާސަތަށް އަލިއަޅުއްވާލައްވަމުން ވަޒީރު ވިދާޅުވީ، 1967 ވަނަ އަހަރުގެ ކުރިން ކަނޑައެޅިފައި އޮތް އިންތަކުގެ މައްޗަށް ބިނާކޮށް، އިރުމަތީ ޤުދަންސަކީ އެ ޤައުމުގެ ވެރިކަންކުރާ ރަށް ކަމުގައި ހަމަޖައްސައި، އަމިއްލަ ސިޔާދަތީ ބާރު ހިނގާ މިނިވަން ދައުލަތެއް ގާއިމުކުރުމަށް ރާއްޖެއިން އަބަދުވެސް ވަކާލާތު ކުރާނެ ކަމަށެވެ. އަދި މިކަން ހާސިލުކުރުމަށްޓަކައި އޯއައިސީގެ މެންބަރު ހުރިހާ ޤައުމުތަކެއް ގުޅިގެން މަސައްކަތްކުރުމަށް އެކަމަނާ ގޮވާލެއްވިއެވެ.
ރާއްޖެއިން އޯއައިސީއާ ގުޅުނުތާ 50 އަހަރު ފުރުން ފާހަގަކުރާ މިއަހަރު، އެ ޖަމްޢިއްޔާއާއި މެންބަރު ޤައުމުތަކާއެކު އޮތް ގުޅުން އިތުރަށް ބަދަހިކޮށް، އިސްލާމީ އުއްމަތުގެ މަސްލަހަތު އިސްކޮށްގެން މަސައްކަތްކުރުމުގައި ރާއްޖެ އަބަދުވެސް ދެމިއޮންނާނެކަމަށް ވަޒީރު ވިދާޅުވިއެވެ.
ދެމެހެއްޓެނިވި ތަރައްގީއާއި ސުލްހަ މަސަލަސްކަން ގާއިމުކުރެވޭނީ މުޖުތަމައުގެ ހުރިހާ ފަންތިއެއްގެ ބައިވެރިވުން ހިމެނިގެންކަން ފާހަގަކުރައްވަމުން، އެ އަމާޒަށް ވާސިލުވުމަށްޓަކައި ދިވެހި ސަރުކާރުން ކުރަމުންދާ މަސައްކަތްތަކުގެ ތަފްސީލުވެސް ވަޒީރު ވަނީ މި ބައްދަލުވުމުގައި ހިއްސާކުރައްވާފައެވެ.
މި ބައްދަލުވުމުގެ ހަވާސާގައި ވަޒީރު އިރުތިޝާމް ވަނީ އޯއައިސީގެ އެކި ޤައުމުތަކުގެ ޚާރިޖީ ވަޒީރުންނާ ބައްދަލުކުރައްވައި، ދެފަރާތުގެ މަސްލަހަތު ހިމެނޭ ދާއިރާތަކުން ގުޅުން ބަދަހިކުރުމާ މެދު މަޝްވަރާ ކުރައްވާފައެވެ. އަހަރަކު އެއްފަހަރު ބާއްވާ މި ބައްދަލުވުމުގައި ވަޒީރުގެ އަރިހުގައި އެޑިޝަނަލް ސެކްރެޓަރީ ޝިރުޒިމަތު ސަމީރު އަދި އެސިސްޓަންޓް ޑިރެކްޓަރު މުހައްމަދު ޝުޖާއު ބައިވެރިވެވަޑައިގެންނެވިއެވެ.
