ސިނާމާލެ ބްރިޖު ހައިވޭގައި ގާއިމުކޮށްފައިވާ ވެހިކަލް ޗެކްޕޮއިންޓެއްގައި ވާޖިބު އަދާކުރަން ހުރި ފުލުހެއްގެ ގައިގައި ބާރު ސްޕީޑުގައި ދުއްވާފައިދިޔަ ސައިކަލަކުން ޖައްސައި ބޮޑެތި އަނިޔާތަކެއް ދިން މައްސަލައިގައި ހައްޔަރުކުރި ހަތަރު މީހުންގެ ޔޫރިންގެ ވަގުތީ ނަތީޖާ މަސްތުވާތަކެއްޗަށް ޕޮޒިޓިވްވެފައިވާ ކަމަށް ފުލުހުން ހާމަކޮށްފިއެވެ.
ކްރިމިނަލް ކޯޓުން ވަނީ މި ހަތަރު މީހުންގެ ބަންދަށް ފަސް ދުވަހުގެ މުއްދަތެއް ދީފައެވެ.
މާލެއިން ހުޅުމާލެއަށް ދަތުރުކުރާ ލޭނުގައި ފަތިހު 04:29 ހާއިރު ހިނގި މި ނުރައްކާތެރި އެކްސިޑެންޓް ހިނގާފައިވަނީ ގަޑިއަކު 100 ކިލޯމީޓަރަށްވުރެ ބާރު ސްޕީޑުގައި ދުއްވާފައި އައި ސައިކަލެއް، މަގުމަތީގައި ޖަހާފައި ހުރި ބެރިކޭޑުތަކުގައި ޖެހި، އެއާއެކު ޑިއުޓީގައި ހުރި އޮފިސަރުގެ ގައިގައި ޖެހިގެންނެވެ. މި ހާދިސާގައި އަނިޔާވި އޮފިސަރުގެ އަނގަމަތި ފަޅައިގެން ގޮސް، ދަތްތައް ބިންދައިގެން ގޮސް ބޮޑެތި އަނިޔާތަކެއް ލިބިފައިވާތީ މިހާރު އަންނަނީ އޭޑީކޭ ހޮސްޕިޓަލުގައި ފަރުވާދެމުންނެވެ.
މި މައްސަލައިގައި ފުލުހުން ހައްޔަރުކޮށްފައި ވަނީ އައްޑޫ ސިޓީއަށް ނިސްބަތްވާ 21 އަހަރުގެ ޒުވާނަކާއި، ގާފަރަށް ނިސްބަތްވާ 30 އަހަރުގެ ޒުވާނަކާއި، ކުޅުދުއްފުއްޓަށް ނިސްބަތްވާ 21 އަހަރުގެ ޒުވާނެއްގެ އިތުރުން މާލެއަށް ނިސްބަތްވާ 21 އަހަރުގެ ޒުވާނެކެވެ. މީގެ ތެރޭގައި ހިމެނެނީ ފުލުހުންގެ ގައިގައި ޖެއްސި ސައިކަލުގައި ތިބި ދެ މީހުންގެ އިތުރުން މި އަމަލުގައި ބައިވެރިވި އިތުރު ދެ މީހެކެވެ. އަދި މި ހާދިސާ ހިނގި ވަގުތު އިތުރު ތިން ސައިކަލެއް ބައިވެރިވިކަން ފާހަގަކުރެވިފައިވާ ކަމަށް ފުލުހުން ބުނެފައިވެއެވެ.
މަސްތުހާލުގައި ތިބެ އާންމުންގެ ހިތްތަކުގައި ބިރުވެރިކަން އުފެދޭ ގޮތަށް އެއްގަމު އުޅަނދު ދުއްވާފައިވާ ކަމަށް ތުހުމަތުކުރެވޭ މި މީހުންގެ ބަންދަށް ކޯޓުން ކުރު މުއްދަތެއް ދީފައި ވަނީ ވަކީލެއް އައްޔަން ކުރުމުގެ ފުރުސަތަށް އެދުމުންނެވެ. މީގެ އިތުރުން، މި މައްސަލައިގައި ހިމެނޭ ތިން މީހަކު، އަނިޔާވި މީހަކު އޭޑީކޭ ހޮސްޕިޓަލުގައި އޮތް ކަމަށް ބުނެ އެ ތަނުގައި އަޑުގަދަކޮށް، ހޮސްޕިޓަލުގެ މުވައްޒަފުންނާއި ފުލުހުންނަށް ހަޑިހުތުރު ބަހުން މުއާމަލާތުކޮށް ފުލުހުންގެ ދައުރު އަދާކުރުމަށް ހުރަސްއަޅާފައިވާ ކަމަށްވެސް ކޯޓު އަމުރުގައި ފާހަގަކޮށްފައިވެއެވެ.
