މެލޭޝިއާގެ ޖޯހޯރު ސަރަޙައްދުގައި ފުލުހުން ހިންގި ޚާއްޞަ ދެ އޮޕަރޭޝަނެއްގައި، 18.19 މިލިއަން ރިންގިޓް (4.45 މިލިއަން ޑޮލަރު) ގެ މަސްތުވާތަކެތި އަތުލައިގަނެ، ވަގަށް މަސްތުވާތަކެތި އުފައްދަން ތައްޔާރުވަމުންދިޔަ ބޮޑު ނެޓްވޯކެއްގެ އޮޕަރޭޝަން ފުލުހުން ހުއްޓުވައިފިއެވެ.
މި މަހުގެ އެއްވަނަ ދުވަހު ޖޯހޯރުގެ ޓަމަން މެގާ ރިއާ އާއި ޖަލާން ޕަމާސް ސަރަޙައްދުގައި ހިންގި މި ރޭޑުތަކުގައި، ޢުމުރުން 17 އަހަރާއި 22 އަހަރާ ދެމެދުގެ ތިން ޒުވާނަކު ވަނީ ފުލުހުންގެ ބެލުމުގެ ދަށަށް ގެންގޮސްފައެވެ.
ބުކިޓް އަމާން ނާކޮޓިކްސް ކްރިމިނަލް އިންވެސްޓިގޭޝަން ޑިޕާޓްމަންޓް (އެންސީއައިޑީ) ގެ ޑިރެކްޓަރު ކޮމިޝަނަރު ހުސައިން އުމަރު ޚާން ވިދާޅުވި ގޮތުގައި، ފުލުހުންގެ އޮޕަރޭޝަނުގައި 106 ކިލޯއަށް ވުރެ ގިނަ އެމްޑީއެމްއޭ ޕައުޑަރާއި، އެހެނިހެން ބާވަތްތަކުގެ މަސްތުވާތަކެތީގެ އިތުރުން މަސްތުވާތަކެތި އުފެއްދުމަށް ބޭނުންކުރާ ތަފާތު ކެމިކަލްތަކާއި އާލާތްތައް ވަނީ ހޯދައިފައެވެ.
ޖޯހޯރުގެ ފުލުހުންގެ މައި މަރުކަޒުގައި ބޭއްވި ނޫސްވެރިންގެ ބައްދަލުވުމެއްގައި ޚާން ފާހަގަކުރެއްވި ގޮތުގައި، އަތުލައިގަނެވުނު ތަކެއްޗަކީ ގާތްގަނޑަކަށް 426،000 މީހުންނަށް އޭގެ ނުރައްކާ ފޯރާނެ މިންވަރުގެ މަސްތުވާތަކެއްޗެވެ. އަދި މި ނެޓްވޯކަކީ މިއަހަރުގެ ޖޫން މަހުގެ ތެރޭގައި މަސައްކަތް ފެށި ނެޓްވޯކެއް ކަމަށާއި، ފުލުހުން ރޭޑުކުރި ވަގުތަކީވެސް ލެބޯޓަރީ ތައްޔާރުކުރުމުގެ މަސައްކަތް ކުރިއަށްދިޔަ ވަގުތު ކަމަށް އޭނާ ވިދާޅުވިއެވެ.
މި ނެޓްވޯކުން ކެމިކަލްތަކާއި އާލާތްތައް ރައްކާކުރުމަށް ފިހާރަތަކެއް ބޭނުންކުރިއިރު، މަސްތުވާތަކެތި އުފައްދާ ލެބޯޓަރީއެއްގެ ގޮތުގައި ބޭނުންކޮށްފައިވަނީ ޓެރަސްއެއް ހުންނަ ގެއެކެވެ. ފުލުހުން ބުނި ގޮތުގައި، އެ ނެޓްވޯކުން މަސްތުވާތަކެތި އުފެއްދުމަށް ބޭރު ގައުމުތަކުން ކެމިސްޓުން ގެނައުމަށް ކުރި މަސައްކަތް ކާމިޔާބުވެފައި ނުވާތީ، މަސްތުވާތަކެތި އުފައްދައި ވިއްކުމުގެ ޢަމަލީ މަސައްކަތް އަދި ފެށިފައެއް ނުވެއެވެ. ނަމަވެސް، މި ނެޓްވޯކާ ބައިނަލްއަގުވާމީ ފަރާތްތަކާ ގުޅުން އޮތް ކަމަށް ބެލެވޭކަން ފުލުހުން ވަނީ ހާމަކޮށްފައެވެ.
މި މައްސަލައިގައި ހައްޔަރުކުރި ތިން މީހުންގެ ތެރެއިން ދެ މީހަކު މެތަމްފެޓަމިންއަށް ޕޮޒިޓިވްވެފައިވީ ނަމަވެސް، އެއިން އެއްވެސް މީހެއްގެ ކުށުގެ އެއްވެސް ރެކޯޑެއް ކުރިން ނެތް ކަމަށް މެލޭޝިއާގެ ފުލުހުން ވަނީ ބުނެފައެވެ.
