ހުރްމޫޒް ކަނޑުއޮޅިން ދަތުރުކުރާ ވިޔަފާރި ބޯޓުފަހަރަށް އޮތް ނުރައްކާ ’ވަރަށް ބޮޑު‘ ކަމަށާއި، އިތުރު ޙަމަލާތަކެއް ދިނުމަކީ ވަރަށް އެކަށީގެންވާ ކަމެއްކަމަށް ޔޫކޭ މެރިޓައިމް ޓްރޭޑް އޮޕަރޭޝަންސް (ޔޫކޭއެމްޓީއޯ) އިން އިންޒާރުދީފިއެވެ.
މި އިންޒާރު ދީފައިމިވަނީ، އޮކްޓޯބަރު 11 އިން 13 އަށް އެ ސަރަޙައްދުން ދަތުރުކުރި 8 ބޯޓަކަށް ޙަމަލާދީފައިވާ ދަނޑިވަޅެއްގައެވެ. މީގެ ތެރޭގައި ހިމެނޭ ސިންގަޕޫރުގެ ކޮންޓެއިނަރ ބޯޓެއް ކަމަށްވާ ’ޖީއެފްއެސް ޕްރައިޑް‘ އަށް ޙަމަލާ އެރުމުގެ ސަބަބުން އަލިފާން ރޯވެ، އޮކްޓޯބަރު 14 ވަނަ ދުވަހު އެ ބޯޓު ވަނީ އަޑިއަށް ގޮސްފައެވެ. ނަމަވެސް ބޯޓުގައި ތިބި 21 ފަޅުވެރިން ވަނީ ސަލާމަތްކުރެވިފައެވެ.
ޔޫކޭއެމްޓީއޯ އިން ބުނާގޮތުގައި އީރާނުގެ އައިއާރުޖީސީން ދަނީ މެދުކެނޑުމެއްނެތި ބޯޓުތަކަށް އުނދަގޫކޮށް ޙަމަލާދެމުންނެވެ. އަދި ބޯޓުތަކުގެ ލޮކޭޝަން އަންގައިދޭ ނިޒާމު (އޭއައިއެސް) ޖައްސައިގެން ދަތުރުކުރާ ބޯޓުތަކަށް އޮތް ނުރައްކާ ބޮޑުކަމަށްވެސް ވަނީ އިންޒާރުދީފައެވެ.
މި ނުރައްކާތަކާ ގުޅިގެން ހޮރްމޫޒް ކަނޑުއޮޅިން ދަތުރުކުރާ ބޯޓުފަހަރުގެ ޢަދަދު ވަނީ ހަނގުރާމައިގެ ކުރިން އޮތް މިންވަރަށްވުރެ ވަރަށް ބޮޑަށް ދަށްވެފައެވެ.
