ގޯތިގެދޮރު އިމާރާތްކުރުމަށް ބޭންކުތަކުން ދޫކުރާ ލޯނުތައް ހޯދުމުގައި އާންމުންނަށް ކުރިމަތިވާ އެންމެ ބޮޑު ގޮންޖެހުން ކަމަށްވާ އިކުއިޓީ ފައިސާ ދެއްކުމަށް އެހީތެރިވުމުގެ ގޮތުން، ކޮންމެ ރައްޔިތަކަށް ދެ ލައްކަ ރުފިޔާގެ މާލީ އެހީއެއް ދިނުމަށް ސަރުކާރުން ނިންމައިފިއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިކަން ހާމަކުރެއްވީ ”ރައްޔިތުންގެ އަޑު“ ސިލްސިލާގެ 10 ވަނަ ޕްރޮގްރާމްގައި، ހުޅުމާލެއިން ލިބިފައިވާ ގޯތީގައި ގެދޮރު ބިނާކުރުމަށް ބޭންކު ލޯނު ނެގުމުގައި ހުރަސްތަކެއް ހުރިކަމަށް ބުނެ އާންމު ރައްޔިތަކު ހުށަހެޅި ކަންބޮޑުވުންތަކަށް ޖަވާބުދެއްވަމުންނެވެ.
އާންމުކޮށް ބޭންކުތަކުން ލޯނު ދޫކުރަނީ ޖުމްލަ އަދަދުގެ ފަސް އިންސައްތަ އިކުއިޓީގެ ގޮތުގައި ދެއްކުމުން ކަމަށްވާއިރު، އެ ފައިސާ އެއްފަހަރާ ދެއްކުމަކީ ގިނަ އާއިލާތަކަކަށް ނުހުއްޓެވޭވަރުގެ ބޮޑު ތަކުލީފެކެވެ. ރައީސް ވިދާޅުވީ ގެދޮރު ނުހެދިފައި ތިބި ފަރާތްތަކަށް ބޭންކިން ނިޒާމުގެ ތެރެއިން ފުރުސަތުތައް ފަހިކޮށްދީ، އުސޫލުތަކަށް ލުއިގޮތްތަކެއް ހޯދައިދިނުމަކީ ސަރުކާރުން އިންތިހާއަށް އިސްކަންދޭ ކަމެއް ކަމަށެވެ.
މި މައްސަލައަށް ދާއިމީ ހައްލެއް ހޯދައިދިނުމުގެ ގޮތުން ޚާއްސަ ސްކީމެއް އެކުލަވާލުމުގެ މަސައްކަތް މިހާރު ކުރިއަށްދާއިރު، އެކަމަށް ބޭނުންވާ ފައިސާ ޓްރަސްޓް ފަންޑެއްގައި ރައްކާކުރެވިފައިވާ ކަމަށް ރައީސް ފާހަގަކުރެއްވިއެވެ.
މި އެހީއަކީ އަނބުރާ ދައްކަންޖެހޭ ލޯނެއް ނޫންކަން ފާހަގަކުރައްވަމުން ރައީސް ވިދާޅުވީ، އެއް ގޯއްޗެއްގެ ހައްގުވެރިންގެ ގޮތުގައި އާއިލާގެ ތިން ހަތަރު މީހުން ތިބެގެން އެކުގައި އެދިއްޖެނަމަ ޖުމްލަ އެކުއެކީގައި މިލިއަނެއްހާ ރުފިޔާގެ އެހީ ސަރުކާރުގެ ތެރެއިން ލިބިގެންދާނެ ކަމަށެވެ.
ގޯތިގެދޮރުގެ ދަތިކަން ހައްލުކޮށްދިނުމަށްޓަކައި ސަރުކާރުން ކުރެވެން ހުރި ހުރިހާ ކަމެއް ކޮށްދެއްވާނެ ކަމުގެ ޔަގީންކަން ދެއްވަމުން ރައީސް ވިދާޅުވީ، އާ އުސޫލުގެ ދަށުން މާލޭގެ ގިނަ ބަޔަކަށް ގެދޮރު އިމާރާތްކުރުމުގެ ލޯނު ހޯދުމުގެ މަގު ފަހިވެގެންދާނެ ކަމަށެވެ.
