ސަޢޫދީ ޢަރަބިއްޔާގެ ޤައުމީ ތެޔޮ ކުންފުނި، އަރާމްކޯއަށް އަމާޒުކޮށް ދެމުންދާ ޙަމަލާތަކުން ލިބޭ ގެއްލުންތައް ކުޑަކުރުމަށާއި، ކުއްލި ޙާލަތްތަކުގައި ޢަމަލުކުރާނެ ގޮތުގެ ޤާބިލުކަން ވަރަށް ބޮޑަށް އިތުރުކޮށްފައިވާކަމަށް އެ ކުންފުނީގެ ސީއީއޯ އަމީން ނާސިރު ވިދާޅުވެއްޖެއެވެ.
ރޮއިޓަރސްއަށް މަޢުލޫމާތު ދެމުން ނާސިރު ބުނީ، އެއްފަހަރާ ގިނަ ޙަމަލާތަކެއް އެރި ނަމަވެސް އެކަމުން އަރައިގަތުމުގެ ޤާބިލުކަން މިހާރު ކުންފުނީގައި އެބަހުރި ކަމަށެވެ. އަދި އެހެން ކުންފުނިތަކަށްވުރެ 6 ގުނަ އަވަހަށް އަރާމްކޯއިން ޙާލަތު ކޮންޓްރޯލްކުރާނެ ކަމަށް އޭނާ ބުންޏެވެ. މިގޮތުން ގެއްލުންތައް ބެލުމަށް ޚާއްޞަ ޑްރޯންތަކާއި، ކުއްލި ޙާލަތްތަކަށް ޚާއްޞަ ޓީމުތައް ވަނީ އެކުލަވާލާފައެވެ.
ހޫޘީންގެ ޙަމަލާތައް އިތުރުވެ، ކަނޑުދަތުރުފަތުރަށް ނުރައްކާ ބޮޑުވަމުންދާތީ، އަރާމްކޯއިން ދަނީ ދުނިޔޭގެ ބާޒާރަށް ތެޔޮ ފޯރުކޮށްދިނުމަށް އައު މަގުތަކެއް ހޯދަމުންނެވެ. އޭގެ ތެރޭގައި ހުރްމުޒް ކަނޑުއޮޅިއާއި، ބާބުލް މަންދަބް އަދި ސުއޭޒް ކެނަލް ނޫން އެހެން މަގުތަކުން ތެޔޮ ބޭރުކުރެވޭނެ ގޮތްތައް ދަނީ ބަލަމުންނެވެ.
