ޗައިނާގެ ޓެކްނޮލޮޖީ ކުންފުނި އަލީބާބާއިން އެ ކުންފުނީގެ އާޓިފިޝަލް އިންޓެލިޖެންސް (އޭއައި) އެސިސްޓެންޓް ”ކުއެން“ ހިމެނޭ ”ކުއެން ގްލާސަސް އެން1“ ސީރީޒްގެ ސްމާޓް އައިނު ރަސްމީކޮށް ތަޢާރަފުކޮށްފިއެވެ.
ޗައިނާގެ ހަންގްޒޫގައި ބޭއްވި ޚާއްޞަ ޙަރަކާތެއްގައި އިޢުލާންކުރި މި އައިނަކީ މެޓާ ކުންފުނީގެ ރޭބޭން ސްމާޓް އައިނާ ވާދަކުރުމަށް އަލީބާބާއިން ބާޒާރަށް ނެރުނު އުފެއްދުމެކެވެ.
އަލަށް ނެރުނު މި އައިނުގެ އަގު އުޅެނީ 2,999 ޔުއާން (ގާތްގަނޑަކަށް 450 އެމެރިކާ ޑޮލަރު) އިން ފެށިގެންނެވެ. މި އައިނުގައި 50 މެގަޕިކްސެލްގެ ކެމެރާއަކާއި އިތުރަށް ފުރިހަމަކޮށްފައިވާ ސެންސަރުތައް ހިމެނެއެވެ. އަދި މި އައިނު މެދުވެރިކޮށް ވިޔަފާރިކުރުމާއި، ފައިސާ ދެއްކުމުގެ އިތުރުން ޞިއްޙީ މަޢުލޫމާތު ބެލެހެއްޓުމުގެ ޚިދުމަތްތައް ލިބިގެންދާނެއެވެ.
މި ސީރީޒްގެ ”ޕްރޯ“ އެޑިޝަންގެ އަގަކީ 3,499 ޔުއާން (ގާތްގަނޑަކަށް 500 އެމެރިކާ ޑޮލަރު) އެވެ. މި މޮޑެލްގައި ލޮލުގެ ޙަރަކާތްތައް ދެނެގަނެވޭ ”އައި-ޓްރެކިންގ“ ޓެކްނޮލޮޖީ ހިމަނާފައިވެއެވެ. ބޯން-ކޮންޑަކްޝަން މައިކްރޯފޯނު މެދުވެރިކޮށް ކުއެން އޭއައިއާ މުޢާމަލާތް ކުރެވޭ މި އައިނަކީ އެއްފަހަރު ޗާޖުކޮށްލައިގެން 25 ގަޑިއިރު ސްޓޭންޑްބައިގައި ބެހެއްޓޭ އަދި 9 ގަޑިއިރު ވަންދެން ލަވަ އަޑުއެހޭނެ ބެޓެރީ ލައިފެއް އެކުލެވޭ އުފެއްދުމެކެވެ.
މިއީ 2025 ވަނަ އަހަރުގެ ނޮވެމްބަރު މަހު އަލީބާބާއިން ފުރަތަމަ ޖެނެރޭޝަންގެ ސްމާޓް އައިނު ނެރުނުފަހުން، އެ ކުންފުނިން ތަޢާރަފުކުރި އާ މޮޑެލްތަކެކެވެ. އަލީބާބާގެ ސީއީއޯ އެޑީ ވޫ ވިދާޅުވެފައިވަނީ އޭއައިގެ ޤާބިލުކަން ކޮމްޕިއުޓަރާއި މޯބައިލް ފޯނުތަކުގެ އިތުރުން އިންސާނުންގެ އާންމު ދިރިއުޅުމުގެ ތެރެއަށް ފުޅާވެގެންދާންޖެހޭ ކަމަށެވެ.
މި އައިނުގެ އިތުރުން އަލީބާބާއިން ވަނީ މަޝްހޫރު އޯޑިއޯ ކުންފުނި ބޯސް އާއެކު އުފެއްދި ”ކުއެން ކްލިޕް“ އޭއައި އިއަރބަޑްސްވެސް ބާޒާރަށް ނެރެފައެވެ. 1,299 ޔުއާން (ގާތްގަނޑަކަށް 200 އެމެރިކާ ޑޮލަރު) އަށް ވިއްކާ މި އިއަރބަޑްސްގެ ސަބަބުން ކުއެން އޭއައިގެ ޚިދުމަތްތައް ބޭނުންކުރުމަށް ކަސްޓަމަރުންނަށް އިތުރު ފަސޭހައެއް ލިބިގެންދާނެއެވެ.
