ފިނި މޫސުން ގާތްވަމުން އަންނައިރު، ޣައްޒާގައި ގެދޮރު ގެއްލިފައިވާ އެތައް ލައްކަ ބަޔަކަށް އެކަށީގެންވާ ބޯހިޔާވަހިކަމެއް ނެތުމުގެ ސަބަބުން ބޮޑު އިންސާނީ ކާރިސާއަކާ ވަނީ ކުރިމަތިވެފައެވެ.
ޣައްޒާގެ މިނިސްޓްރީ އޮފް ސޯޝަލް ޑިވެލޮޕްމަންޓުން ވަނީ، ފިނިގަދަވުމާއި ފެންބޮޑުވުމުގެ ސަބަބުން 300،000 އަށްވުރެ ގިނަ ޢާއިލާއަށް ނުރައްކާވެފައިވާ ކަމުގެ އިންޒާރު ދީފައެވެ. މިނިސްޓްރީން ހާމަކޮށްފައިވާ ގޮތުގައި، ގެދޮރު ގެއްލިފައިވާ މީހުން މިހާރު ދިރިއުޅެމުންދާ ޓެންޓުތަކުގެ 90 އިންސައްތަ ވަނީ ބާވެ، ދިރިއުޅެން އެކަށީގެންނުވާ ވަރަށް ހަލާކުވެފައެވެ.
މީގެ އިތުރުން، ޣައްޒާގެ ޢާންމުން ދިރިއުޅޭ ގެތަކާއި އިމާރާތްތަކުގެ 85 އިންސައްތަ ވަނީ އިޒްރޭލުގެ ޙަމަލާތަކުގައި ހަލާކުކޮށް ނުވަތަ ބިމާ ހަމަކޮށްލާފައެވެ. އެހެންކަމުން މީހުންނަށް އެނބުރި ދާނެ އެއްވެސް ތަނެއް ނެތެވެ. ޣައްޒާގައި ހުރި އިމަރޖެންސީ ޓެންޓުތަކުގެ ސްޓޮކް މިހާރު ވަނީ މުޅިން ހުސްވެފައެވެ. އަދި ބޯހިޔާވަހިކަން ފޯރުކޮށްދިނުމަށް ބޭނުންވާ ފައިސާގެ ތެރެއިން މިހާތަނަށް ލިބިފައިވަނީ އެންމެ 34 އިންސައްތައެވެ.
މި ބޮޑު ކާރިސާއިން ސަލާމަތްވުމަށްޓަކައި، ފިނި މޫސުމަށް ކެތްކުރެވޭ ފަދަ 200،000 ޓެންޓާއި، ބޯހިޔާވަހިކަން ހޯދުމަށް ބޭނުންކުރާ 300،000 އިމަރޖެންސީ ކިޓް ވީއެންމެ އަވަހަކަށް ޣައްޒާއަށް ވެއްދުމުގެ ހުއްދަ ދިނުމަށް މިނިސްޓްރީން ވަނީ ގޮވާލާފައެވެ.
