ބޭންކް އޮފް މޯލްޑިވްސް (ބީ.އެމް.އެލް) އިން، ޓެކްނޮލޮޖީ ދާއިރާއަށް ޝައުގުވެރިކަން ހުރި ޒުވާނުންނަށް އަމާޒުކޮށް، ”ބީ.އެމް.އެލް ޓެކް އިންޓަރންޝިޕް ޕްރޮގްރާމް“ ގެ ދަށުން މުހިންމު ފުރުސަތުތަކެއް ހުޅުވާލައިފިއެވެ.
ގައުމުގެ އެންމެ އިސް ކުންފުނިތަކުގެ ތެރޭގައި ހިމެނޭ ބީ.އެމް.އެލް އިން މިފަދަ ޕްރޮގްރާމެއް ފެށުމުގެ މައިގަނޑު މަގުސަދަކީ، ޒުވާނުންނަށް އަމަލީ ވަޒީފާގެ ތަޖުރިބާ ހޯދައިދިނުމާއި، އެމީހުންގެ ހުނަރުތައް ތަރައްގީ ކުރުމަށް ފަހި މާހައުލެއް ބިނާކޮށްދިނުމެވެ. މި ޕްރޮގްރާމަށް އެޕްލިކޭޝަން ހުށަހެޅުމުގެ ފުރުސަތު 12 އޮކްޓޯބަރ 2026 އިން ފެށިގެން 22 އޮކްޓޯބަރ 2026 އަށް ވަނީ ހުޅުވާލައިފައެވެ.
މި ޕްރޮގްރާމްގެ ދަށުން ބައިވެރިންނަށް ލައިވް ޕްރޮޖެކްޓްތަކުގައި ބައިވެރިވެ، އިންޑަސްޓްރީގެ އަމަލީ ތަޖުރިބާ ހޯދުމުގެ ފުރުސަތު ލިބިގެންދާނެއެވެ. މީގެ އިތުރުން، ފަންނީ މާހިރުންގެ މެންޓޯޝިޕްގެ ދަށުން އަގުހުރި ހުނަރުތަކެއް އުނގެނި، ޓެކްނިކަލް އަދި ޕްރޮފެޝަނަލް ހުނަރުތައް ތަރައްގީ ކުރުމުގެ ފުރުސަތު ވެސް ލިބިގެންދާނެއެވެ. ޕްރޮގްރާމްގެ މުއްދަތަކީ 1 އަހަރައްވާއިރު، ބައިވެރިވާ ކޮންމެ އިންޓާރނަކަށް ވެސް އަހަރެއްގެ ފެށުމުގައި މުހިންމު ޕަރފޯމަންސް އޮބްޖެކްޓިވްސްތަކެއް ކަނޑައެޅޭނެއެވެ. އަދި މަސައްކަތުގައި އިރުޝާދު ދިނުމަށްޓަކައި ލައިން މެނޭޖަރަކާއި މެންޓަރަކު ވެސް ކަނޑައެޅޭނެއެވެ. މަސައްކަތު ގަޑިއަކަށް ކަނޑައަޅާފައި ވަނީ ދުވާލަކު 6 ގަޑިއިރެވެ.
މި ޕްރޮގްރާމްގައި ބައިވެރިވާ ފަރާތްތަކަށް ގިނަ ފައިދާތަކެއް ލިބިގެންދާނެއެވެ. އޭގެ ތެރޭގައި މަހަކު 11,000 ރުފިޔާގެ އެލަވަންސަކާއި، ރަމަޟާން ބޯނަސް ލިބުމުގެ ހައްގު ހިމެނެއެވެ. މީގެ އިތުރުން، އަހަރީ ޗުއްޓީގެ ގޮތުގައި 15 ދުވަހުގެ މުސާރަ ލިބޭ ޗުއްޓީއާއި، ބަލިވުމުގެ ސަބަބުން ނުވަތަ އާއިލީ ކުއްލި ހާލަތްތަކަށް 10 ދުވަހުގެ ޗުއްޓީ ވެސް ލިބޭނެއެވެ. މި ފުރުސަތަށް ކުރިމަތިލެވޭނީ 18 އަހަރު ފުރިފައިވާ، ޓެކްނޮލޮޖީއާ ގުޅުންހުރި ދާއިރާއަކުން ތައުލީމު ހާސިލުކުރަމުންދާ ނުވަތަ ތައުލީމު ފުރިހަމަކޮށްފައިވާ ދިވެހީންނަށެވެ. މީގެ އިތުރުން، މި ދާއިރާއިން ފަންނީ ހުނަރު ހުރި ފަރާތްތަކަށްވެސް ފުރުސަތުވަނީ ހުޅުވާލެވިފައެވެ.
ޕްރޮގްރާމްގެ އަހަރު ނިމޭއިރު ބޭންކްގެ ޕޮލިސީތަކަށް ތަބާވެ، ރަނގަޅު މަސައްކަތެއް ދައްކައި، ހާޒިރީ ރަނގަޅު އިންޓާރނުންނަށް ޕްރޮގްރާމް ނިންމިކަމުގެ ސެޓްފިކެޓެއް ދޫކުރެވޭނެއެވެ. އިންޓަރންޝިޕްގެ މުއްދަތުގައި އާމްދަނީއެއް ލިބުމުގެ އިތުރުން، އިންޑަސްޓްރީގެ ތަފާތު ތަޖުރިބާތައް ހޯދުމުގެ ފުރުސަތު ވެސް ބައިވެރިންނަށް ލިބިގެންދާނެއެވެ. ޕްރޮގްރާމް ކާމިޔާބުކަމާއެކު ނިންމާލާ ބައިވެރިންގެ ތެރެއިން ރަނގަޅު ކެޕޭބިލިޓީ ދައްކާ ފަރާތްތަކަށް ބީ.އެމް.އެލް އިން ފުލް-ޓައިމް ވަޒީފާގެ ފުރުސަތުތައް ހުޅުވާލުމަށް ވެސް ހަމަޖެހިފައިވެއެވެ.
